2015-02-14 00:38

განცხადება, რომლითაც სახელწიფო დაცვის სამსახურის უფროსმა ზურაბ ჟვანიას 2002 წელს მიმართა, საქმეზე ბრალდებული კობა ხარშილაძის ადვოკატმა დღეს გაასაჯაროვა.

დოკუმენტით ირკვევა, რომ ჯერ კიდევ პარლამენტის წევრობისას ჟვანიას პირადი დაცვა მას სთხოვდა, რომ მათთვის დაკისრებული მოვალეობის შესრულებაში ხელი არ შეეშალა.

ახალი დოკუმენტის გასაჯაროვების პარალელურად ზურაბ ჟვანიას მეგობრები, თანამებრძოლები და ყოფილი დაცვის წევრები მიმართვას ავრცელებენ და ყოფილი პრემიერის პირად ცხოვრებასთან დაკავშირებით განხილვების დასრულებას მოითხოვენ.

ზურაბ ჟვანიას საქმეში ერთ-ერთი ბრალდებულის ადვოკატი ამბობს, რომ იმაზე, რაზეც "რუსთავი2"-ის ეთერში თავად ჟვანიას ძმამ ისაუბრა, გარდაცვლილი პრემიერ-მინისტრის დაცვის წევრები ამ დრომდე დუმდნენ. თუმცა, მიხეილ ძაძამია და კობა ხარშილაძე სასამართლოპ

როცესზე, ადვოკატის თქმით, ზურაბ ჟვანიას საქმეზე არაერთი ახალი დეტალის გამხელას აპირებენ.

სასამართლო პროცესის დაწყებას ელოდებიან ჟვანიას მეგობრებიც, რომლებიც პროკურატურას ნდობას უცხადებენ. თუმცა, მოითხოვენ, რომ საქმის ძიება დროულად დასრულდეს.

გარდაცვლილი პრემიერ-მინისტრის მეგობრებისგან განსხვავებით დაცვის მხარეს მიაჩნია, რომ საქმეზე გამოსაძიებელი აღარაფერია.

ზურაბ ჟვანიას საქმეზე ამ დროისათვის ბრალი 3 პირს აქვს წაყენებული. ექსპერტი ლევან ჩაჩუა და დაცვის ყოფილი წევრი, მიხეილ ძაძამია 9-თვიანი წინასწარი პატიმრობის შემდეგ ამ დროისთვის თავისუფლებაზე იმყოფებიან. სასამრთლო პროცესის დაწყებას სასჯელაღსრულების დაწესებულებაში ელოდება ჟვანიას დაცვის უფროსი, კობა ხარშილაძე.