უშიშროების საბჭოს ყოფილი მდივანი გიგა ბოკერია აცხადებს, რომ მისთვის შოკისმომგვრელი აღმოჩნდა, როცა საქართველოს პრემიერმინისტრმა მიუნჰენში არ უპასუხა შტეფან ფულეს შეკითხვას, რომელიც უკრაინისა და საქართველოსთვის ევროკავშირის წევრობის პერსპექტივას ეხებოდა.
ბოკერია არ გამორიცხავს, რომ შესაძლოა, ირაკლი ღარიბაშვილმა, უბრალოდ, ვერ გაიგო ან ყურადღება არ მიაქცია, მაგრამ ფაქტია, რომ მან არ დააფიქსირა საქართველოს პოზიცია:
„რუმინეთის პრეზიდენტმა თქვა, რომ იმ რთულ ვითარებაში, რომელიც უკრაინაშია შექმნილი, ძალიან მნიშნელოვანია, რომ სწრაფად დაიწყოს უკრაინისა და საქართველოს გაწევრიანების პროცესი. ამ საკითხს აჰყვა დისკუსიის მოდერატორი ფულე, რომელმაც კითხვა დაუსვა ჩვენს პრემიერს, იზიარებს თუ არა ამ იდეას, მაგრამ შოკისმომგვერლი იყო ის, რომ საქართველოს პრემიერმა ან ვერ გაიგო ტექსტი და შეკითხვა, ან არ ჩათვალა საჭიროდ და საერთოდ აუარა გვერდი, ანუ არ დააფიქსირა საქართველოს პოზიცია, რომ ჩვენი ამოცანა, ჩვენი ლობირების საგანი ამ კონკრეტულ ეტაპზე არის ეროკავშირის წევრობა.
უნდა ვივარაუდოთ, რომ კამერების გარეშეც, ორმხრივ შეხვედრებზე ის არ აყენებს ამ საკითხს, ანუ, არ ამბობს, რომ ჩენ გვჭირდება ჩვენი მეგობრებისგან უფრო აქტიური ჩარევა იმ პრობლემებში, რომელიც გვაქვს რუსეთის ფედერაციასთან მიმართებაში. ამის შემდეგ მან გაახმოვანა უკრაინის საკითხთან დაკავშირებით პოზიცია, და არათუ ძალადობაზე პასუხისმგებლობაზე არ ისაუბრა, არამედ უფრო შორს წავიდა და თქვა, რომ უკრაინის ბედი უნდა გადაწყვიტონ მეზობელმა ქვეყნებმა, მათ შორის რუსეთმა და ევროკავშირმა“, – გაიხსენა მიუნჰენის კონფერენციაზე საქართველოს პრემიერმინისტრის სიტყვით გამოსვლის დეტალები გიგა ბოკერიამ.
