თბილისში, 31–ე საავიაციო ქარხნის მიმდებარე ტერიტორიაზე 16 წლის მარიამ ჩავლეიშვილის ცხედარი იპოვეს. Mediamall.ge-ს მიერ გავრცელებულ ამ ინფორმაციას შსს–ში ადასტურებენ.
გამოცემის ინფორმაციით, არსებობს ეჭვი, რომ გოგონა ჯერ სექსუალური ძალადობის მსხვერპლი გახდა, შემდეგ კი მოკლეს. ინფორმაციაში ნათქვამია, რომ შემთხვევის ადგილზე აღმოჩენილია ერთჯერადი პლასტმასის ჭიქები და ალკოჰოლური სასმელი. გამოცემა წერს, რომ მკვლელობაში ეჭვმიტანილი მარიამ ჩავლეიშვილის ერთერთი კლასელია. Mediamall.ge გარდაცვლილის ფოტოსაც აქვეყნებს.
შსს–ს პრესსამსახურში ინფორმაციის გადამოწმებისას „აფხაზეთის ხმას“ დაუდასტურეს, რომ გოგონას ცხედარი მართლაც, ნაპოვნია. შინაგანი უწყების პრესსამსახური აცხადებს, რომ ცხედარს, გარეგნული დათვალიერებით, ძალადობის ნიშნები არ ეტყობა, დეტალები კი სათანადო ექსპერტიზის შემდეგ გახდება ცნობილი.
შსს–ს პრესსამსახურის განცხადებით, საქმე აღძრულია თვითმკვლელობამდე მიყვანის მუხლით და მიმდინარეობს გამოძიება.
