2015-01-28 18:28

პრეზიდენტი საზოგადოებას, პროფესიულ წრეებს უზენაესი სასამართლოს თავმჯდომარის კანდიდატურის შესარჩევად 9 თებერვლამდე საკუთარი კანდიდატურების წარდგენას სთხოვს.

ამის შესახებ გიორგი მარგველაშვილმა დღეს გამართულ პრესკონფერენციაზე ისაუბრა, სადაც შეაფასა უზენაესი სასამართლოს თავმჯდომარის შერჩევის წინა პროცესი და გამართულ კონსულტაციებზე  კმაყოფილება გამოთქვა. 

,,უზენაესი სასამართლოს თავმჯდომარის პროცესთან დაკავშირებით ჩვენ დავიწყეთ აქამდე ქართული საზოგადოებისთვის არნახული ღია პროცესი, რომელშიც ჩავრთეთ ყველა - საპარლამენტო პოლიტიკური ძალები, ექსპერტები და გავხსენით ამ მიმართულებით ფართე დისკუსია.

ამ დისკუსიამ გამოავლინა ჩემთვის ერთი ძალიან მნიშვნელოვანი ფენომენი: მთელი საზოგადოება, მათ შორის პოლიტიკური პარტიები თანმხდებიან ერთი და იგივე კრიტერიუმებზე კონსულტაციების შედეგად კრიტერიუმებთან დაკავშირებით კონსენსუსი არის შემდგარი და დღეს, საპარლამენტო უმრავლესობას და ოპოზიციური ფრაქციებიც, ფაქტობრივად, ერთ ხედვაზე გველაპარაკებიან.

რა თქმა უნდა, არის განსხვავებული პატარა დეტალები, მაგრამ ჯამში ეს არის ერთიანი კრიტერიუმები", - განაცხადა პრეზიდენტმა.