ჟურნალ „ტაბულას“ რედაქტორმა, თამარ ჩერგოლეიშვილმა „ფეისბუქის“ პირად გვერდზე „ქვეყანაში სიტყვის თავისუფლების“ მნიშვნელობა განმარტა და ხაზგასმით აღნიშნა, რომ ამას ჩლუნგებისთვის აკეთებს.
„სიტყვის თავისუფლების სახელმძღვანელო ჩლუნგებისთვის:
1. სიტყვა, მათ შორის აღმაშფოთებელი ან შეურაცხყმოფელი სიტყვა, არის დაცული. ადამიანს აქვს უფლება თქვას, დაწეროს ან დახატოს ისეთი რამ რაც სხვას აღაშფოთებს ან შეურაცხყოფს.
2. ვინც აღშფოთდა ან შეურაცხყოფილად იგრძნო თავი, უფლება აქვს თქვას, დაწეროს, დახატოს ისეთი რამ, რაც მის აღშფოთებას ან შეურაცხყოფაზე პასუხს გამოხატავს.
3. აღშფოთებულებს და შეურაცხყოფილებს არ აქვთ უფლება იძალადონ ან სიცოცხლე მოუსწრაფონ მათ, ვინც სიტყვით აღაშფოთა. ზოგადად, სხვისი მოკვლის უფლება მხოლოდ აუცილებელი თავდაცვის შემთხვევაში აქვთ.
4. სიტყვის თავისუფლება შეიძლება შეიზღუდოს თუ:
ა) საქმე ეხება პირისპირ შეურაცხყოფას. ანუ - მე თუ მოვედი თქვენთან და შეგაგინეთ ეს არ იქნება დაცული სიტყვა, ეს იქნება ხულიგნობა. ხულიგნობა სისხლის სამართლის დანაშაულია. განსაკუთრებული ჩლუნგებისთვის აღვნიშნავ, რომ პირისპირ შეურაცხყოფად არ ითვლება მაგალითად მიტინგზე გამომსვლელის სიტყვა, როდესაც მსმენელმა შეურაცხყოფილად ჩათვალა თავი.
ბ) საქმე ეხება ცილისწამებას, ოღონდ ამ შემთხვევაში ცილისწამების მსხვერპლმა უნდა აჩვენოს რა ზიანი მიადგა ცილისწამებით მის რეპუტაციას. თუ საქმე საჯარო პირს ეხება, მას იმის ვალდებულებაც აქვს, დაამტკიცოს, რომ ცილისმწამებელი, სწამებდა რა ცილს, მიზნად მისთვის ზიანის მიყენებას ისახავდა ან განზრახ უგულებელყოფდა ფაქტებს. ცილისწამებად არ შეიძლება ჩაითვალოს შეფასება.
გ) საქმე ეხება მაუწყებლზე გასულ სიტყვას - გამომდინარე იქიდან, რომ მაუწყებლობა შეზღუდული საზოგადოებრივი სიკეთის, ანუ სიხშირის მეშვეობით ხდება, მაუწყებელი ვალდებულია მოქმედებდეს ეთიკის კოდექსის დაცვით, რომლის აღსრულებასაც თავისივე თვითრეგულირების ორგანო უზრუნველყოფს საზოგადოებრივი კონტროლის დახმარებით.
დ) საქმე ეხება მოწოდებას, რომელიც ძალადობის მყისიერ საფრთხეს შეიცავს - მაგალითად ვდგავარ ბევრი ტაბურეტმომარჯვებული ადამიანის წინ და მოვუწოდებ, რომ ამ ტაბურეტებით ჩაქოლონ ის ადამიანები, რომლებიც მათ არ მოსწონთ".
ე) საქმე ეხება სიცოცხლის მოსპობის ან ჯანმრთელობის დაზიანების ანდა ქონების განადგურების მუქარას,
როდესაც იმას, ვისაც ემუქრებიან, გაუჩნდა მუქარის განხორციელების საფუძვლიანი შიში.
ვ) საქმე ეხება შანტაჟს.
4. რელიგიური, პატრიოტული, მამაკაცური, ქალური, დედაშვილური, მამაშვილური ან რაიმე სხვა ტიპის გრძნობების შემლახავი სიტყვა საქართველოში და თავისუფალი სამყაროს უდიდეს ნაწილში არ იზღუდება. არის მცირე გამონაკლისები ევროპის ზოგიერთ ქვეყანაში, მაგალითად ნაცისტური სიმბოლიკის გამოსახვის, ჰოლოკოსტის უარყოფის სახით. ზოგგან მსგავსი შეზღუდვა უმცირესობების დაცვის მოტივითაა ნაკარნახევი. თუმცა მე ამგვარ შეზღუდვებს არ ვეთანხმები, ამერიკული მიდგომა მიმაჩნია სწორად.
PS. უცბად დავწერე. მგონი არაფერი გამომრჩა. თუ გამომრჩა - დავამატებ როცა გამახსენდება. I love you too!", - წერს თამარ ჩერგოლეიშვილი.
