2014-12-27 13:49

მე უნდა წავსულიყავი სტრასბურგში, რომ ხელშეკრულების რატიფიკაცია არ ჩაებარებინა წინა ხელისუფლების პრეზიდენტს. სააკაშვილი იყო იქ, ხომ ნახეთ?! –ამის შესახებ საქართველოს პრეზიდენტმა გიორგი მარგველაშვილმა  გადაცემა ,,რეაქციაში" განაცხადა.

მისივე განცხადებით, მან გაიგო რომ სტრასბურგში მისი თანაგუნდელები არ მიდიოდნენ. გამგზავრება სწორედ იმის გამო გადაწყვიტა, რომ ასოცირების ხელშეკრულების რატიფიცირება ყოფილ პრეზიდენტს არ ჩაებარებინა და გაუგებარი არ ყოფილიყო , რატომ იდგა იქ ექსპრეზიდენტი და რატომ არ იყო ახალი ხელისუფლების წარმომადგენელი.

,,მე ვიმყოფებოდი ვიზიტით. ჩამოვედი და გავიგე, რომ სტრასბურგში არავინ მიდის. ეს იყო ის რეალობა, რომელიც მე გავიგე ჩვენი არხებით. არ ვიცი, რატომ არ მიდიოდა არავინ, მაგრამ მე ნამდვილად ვიცოდი, რომ სტრასბურგის დატოვება სახელმწიფო დელეგაციის გარეშე იქნებოდა არასწორი. ასე რომ, მე არაფრის მომზადების შესაძლებლობა არ მქონდა – დილით სხვა ქვეყნიდან ჩამოვედი და საღამოს სტრასბურგში წავედი.

მე უნდა წავსულიყავი იქ, რომ არ ყოფილიყო გაუგებარი ვითარება და ხელშეკრულების რატიფიკაცია არ ჩაებარებინა წინა ხელისუფლების პრეზიდენტს. სააკაშვილი იყო იქ, ხომ ნახეთ?! წარმოიდგინეთ სურათი, სადაც არის მხოლოდ სააკაშვილი. ცოტა აბსურდული ვითარება იქნებოდა, მარტო ყოფილი პრეზიდენტი რომ ყოფილიყო იქ და სხვა არავინ. შესაბამისად, მე ჩემი თავი ვალდებულად ჩავთვალე, რომ როცა არავინ მიდიოდა, წავსულიყავი და იქ ვყოფილიყავი. ეს იყო ჩემი ვალდებულება", - აღნიშნა მარგველაშვილმა.