2014-12-27 13:38

საქართველოს ჩართვა უკრაინის მოვლენებში სამხედრო თვალსაზრისით არის უაღრესად სახიფათო და საქართველომ ეს ნაბიჯი არ გადადგა,–ამის შესახებ საქართველოს პრეზიდენტმა გიორგი მარგველაშვილმა გადაცემა ,,რეაქციაში" განაცხადა.

,,ჩემი დამოკიდებულება ამ საკითხის მიმართ შემდეგია - ქართულმა სახელმწიფომ უკრაინას მხარი დაუჭირა ჰუმანიტარული და პოლიტიკური თვალსაზრისით. ეს არის ის, რაც ჩვენ უნდა გაგვეკეთებინა. სამხედრო თემატიკაში საქართველოს ჩართვა არის უაღრესად სახიფათო თემა. ჩვენმა სახელმწიფომ ეს ნაბიჯი არ გადადგა, არც უნდა გადაედგა. შესაბამისად, ყველა სხვა ინიციატივა, რომელიც ამ მიმართულებით ხორციელდება, არის ინდივიდების ინიციატივა. პოლიტიკური განხილვების საკითხი ვერ იქნება ქართველი მებრძოლების ქმედებები. ეს ცალკე ისტორებია", - აღნიშნა პრეზიდენტმა. 

პრეზიდენტის თქმით, საქართველომ უკრაინის მხარდამჭერთა შორის ყველაზე მეტი განცხადება გააკეთა, რითაც თავი ხიფათში ჩაიგდო. მარგველაშვილის განცხადებით, საქართველო, როგორც რუსეთის მეზობელი ქვეყანა, ისედაც რისკავს, როცა უკრაინის მხარდასაჭერ განცხადებებს აკეთებს.