ქრისტიანული სამყაროს დიდი ნაწილი დღეს მაცხოვრის შობას ზეიმობს. მთავარი სადღესასწაულო ღონისძიებები ვატიკანსა და ბეთლემში იმართება. კათოლიკე ქრისტიანები შობას თბილისშიც ზეიმობენ - თბილისში მდებარე კათოლიკურ ეკლესიაში სადღესასწაულო წირვა-ლოცვა გაიმართა.
საქართველოს იმ მოქალაქეებს, რომლებიც დღეს შობას აღნიშნავენ, დღესასწაული მიულოცეს საქართველოს პრეზიდენტმა და პრემიერმინისტრმა.
„ძვირფასო თანამოქალაქეებო, გულითადად გილოცავთ შობის ბრწყინვალე დღესასწაულს ყველას, ვინც დღეს ზეიმობთ ამ შესანიშნავ დღეს.
ამ უდიდეს ქრისტიანულ დღესასწაულს ჩვენ ვუკავშირებთ განახლებისა და ნათელი მომავლის რწმენას. დაე, სიყვარული, კეთილდღეობა, მშვიდობა და ბედნიერება მოეტანოს ამ დღეს თქვენს ოჯახებსა და ჩვენს სამშობლოში,“ - აღნიშნულია პრეზიდენტის მისალოც წერილში, ხოლო პრემიერმინისტრის განცხადებაში ნათქვამია:
„დღეს ქრისტიანთა უდიდესი ნაწილი მაცხოვრის შობის დღესასწაულს აღნიშნავს. ვულოცავ ამ დღეს ყველა ჩვენს თანამოქალაქეს, ვისთვისაც 25 დეკემბერი შობის დიდი დღესასწაულია.
ყოველი შობა უკეთესი მომავლის იმედი და რწმენაა. ვუსურვებ ყველას, არ მოჰკლებოდეთ სიკეთე, სიყვარული, მშვიდობა და კეთილდღეობა".
