2014-01-30 04:03

საპარლამენტო უმცირესობა უკვე გამოეხმაურა 29 იანვარს გამოქვეყნებულ, მუხროვანის 2009 წლის ამბოხების ერთი ეპიზოდის ამსახველ ვიდეომასალას, სადაც ვანო მერაბიშვილი და წინა ხელისუფლების სხვა მაღალჩინოსნები ფიგურირებენ.

„ნაციონალური მოძრაობის“ ერთერთი ლიდერი ირმა ნადირაშვილი მიიჩნევს, რომ ვიდეო ხელისუფლების ატვირთულია და მას ამ გზით იმ პრობლემების გადაფარვა სურს, რომლებიც ხალხის წინაშე დგას:

“ვიდეოს ატვირთვიდან ნახევარ საათში პროკურატურამ საზეიმოდ გვამცნო, ძიება დავიწყეთო.

რაღაც არ მახსენდება, ბატონებო, ასეთივე ოპერატიულობა გამოგეჩინათ და შეგესწავლათ, როგორ მოხვდნენ სახელმწიფოს წინააღმდეგ შეიარაღებულ აჯანყებაში ბრალდებული პირები პოლიტპატიმრების სიაში?

რატომ ასევე არ იჩქარეთ ძიების დაწყება, ბანდიტმა ფარცხალაძემ მერაბიშვილი ციხიდან რომ გაიტაცა?

ან როგორ მოხდა ბედუკაძის უდანაშაულოდ აღიარება?

ან ვინ მოკლა 9 თვის რაფალიანცი?

ეს ვიდეო ხელისუფლების ატვირთულია და მიზნად ისახავს ამ ხმაურინი საქმეების გადაფარვას. ამ ვიდეოს ამტვირთავებს უნდათ, ქვეყანა კომპრომატებით მართონ, რომ ადამიანებმა დროებით მაინც დაავიწყონ ლარის გაუფასურება, მილიარდიანი გარღვევა ბიუჯეტში, გაძვირებული საწვავი და პროდუქტები, ღარიბაშვილი- თამაზაშვილის კლანური მმართველობა და სამსახურიდან გამოყრილი ათასობით ადამიანი.”, – წერს ირმა ნადირაშვილი.