2014-12-10 11:05

საქართველოს 2014 წლის ბიუჯეტის შესრულებას საფრთხე არ ემუქრება, რადგან ამ ეტაპზე ბიუჯეტი უკვე არის 70 მილიონით დაგეგმილზე წინ,-ამის შესახებ ფინანსთა მინისტრმა ნოდარ ხადურმა განაცხადა.

2014 წლის ბიუჯეტის შესრულებით დაინტერესდა პრემიერ-მინისტრი მთავრობის სხდომაზე. ირაკლი ღარიბაშვილმა ფინანსთა და ინფრასტრუქტურის მინისტრებს ანგარიშის წარდგენა მოსთხოვა.

„საგადასახადო შემოსავლების თვალსაზრისით ჩვენ ვართ წინ, გეგმაზე დაახლოებით 70 მილიონი ლარით მეტი გვაქვს მობილიზებული და ვფიქრობ, რომ წლევანდელი ბიუჯეტი გადაჭარბებით იქნება შესრულებული, როგორც შემოსავლების, ისე ზოგადად შემოსულობების თვალსაზრისით," - განაცხადა ფინანსთა მინისტრმა.

მისივე თქმით, იყო გარკვეული ჩამორჩენა გრანტებისა და საერთაშორისო დახმარებების მიღების თვალსაზრისით, თუმცა დეკემბრის ბოლომდე მოხდება თანხების დარიცხვა საერთაშორისო სავალუტო ფონდიდან, აზიის განვითარების ბანკიდან და მსოფლიო ბანკიდან.

,,ასე რომ წლევანდელი ბიუჯეტი იქნება შესრულებული და ჩვენ 100 პროცენტზე მეტის იმედიც გვაქვს," - განაცხადა ხადურმა.

ინფრასტრუქტურის მინისტრმა მის სამინისტროს გაწეული ხარჯების ანგარიში წარმოადგინა. მისი თქმით, ბიუჯეტის 81 პროცენტი ნოემბრის მონაცემებით, უკვე ათვისებულია და პროცესი გრძელდება.

,,ჩვენი ბიუჯეტი წელს იყო 936 მილიონი აქედან 755 მილიონი არის უკვე დახარჯული ნოემბრის მაჩვენებლით, ეს არის 81 პროცენტი დაახლოებით, წლის ბოლომდე ჩვენ ველოდებით კიდევ 130-დან 140 მილიონამდე დახარჯვას, ეს იქნება უკვე 85 პროცენტზე ავალთ," - განაცხადა დავით შავლიაშვილმა.