2014-12-09 16:41

ათასობით ქართველის მსგავსად, საკუთარი ოჯახის წევრი ჯერ კიდევ დასაბრუნებელი მყავს, - განაცხადა თავდაცვის ყოფილმა მინისტრმა ირაკლი ალასანიამ, რომელიც სამების საკათედრო ტაძარში ბაბუშარის ტრაგედიის დროს დაღუპული ოთხი ქართველი მებრძოლის სამოქალაქო პანაშვიდს დაესწრო. 

,,დღეს ჩვენი გმირები დავუბრუნეთ საკუთარ ოჯახს. ეს ემოციური ფონი, რომელიც აქ არის შექმნილი, ბუნებრივია, საქართველოს ყველა მოქალაქეს ეხება. მაგრამ ჩემთვის განსაკუთრებით მგრძნობიარეა, რადგან მე თავად ვუყურებდი ამ თვითმფრინავის ჩამოგდებას სოხუმში და, როგორც ათასობით ქართველს, საკუთარი ოჯახის წევრი ჯერ კიდევ დასაბრუნებელი მყავს.

ეს ფაქტი იმედს მიჩენს, რომ ორ მხარეს შორის ურთიერთობები შეიძლება ისე აეგოს, რომ ყველა ჭირისუფალმა საკუთარი ცხედარი დაიბრუნოს. და კიდევ - მე მგონია, 22 წლის შემდეგ ვხვდებით, რომ ჩვენი ცხოვრება სხვანაირად უნდა ავაგოთ აფხაზებთან და ოსებთან.

მე მგონი, ის ადამიანები და ოჯახები, რომლებმაც სისხლი და ხორცი დაკარგეს ამ ბრძოლაში, ყველაზე უფრო წინ დადგებიან პატიებისა და შერიგების ინიციატივების კუთხითაც”, - აღნიშნა ალასანიამ.