2014-11-16 21:39

გასულ კვირას მოკლული ტრანსგენდერის 24 წლის ბექა ბერიანის, იგივე საბის მკვლელობაში ბრალდებულის პირველი კომენტარი დღეს ექსკლუზიურად ,,იმედის კვირაში“ გავიდა.

მკვლელობაში ბრალდებულმა სასამართლო პროცესზე განაცხადა, რომ მოკლულ ბერიანთან ვალის დაბრუნების მოთხოვნით მივიდა, რაც დაპირისპირებაში გადაიზარდა.

,,ჩემს ცხოვრებაში მოხდა ისეთი რაღაცა, რამაც ყველაფერი შეცვალა... ის რომ შემთხვევის ადგილიდან მივიმალე, სულ სხვა ადგილზე მოვედი გონს,“- განაცხადა ლევან კოჭლაშვილმა სასამართლო პროცესზე.

კოჭლაშვილის განცხადებით, ის გლდანში მეუღლის ბინაში ცხოვრობდა, მისივე თქმით, რამდენიმე დღით ადრე მკვლელობამდე ის მეუღლის სახლიდან წამოვიდა და კოჭლაშვილი  ამტკიცებს, რომ ტრანსგენდერის ბინაში ვალის დაბრუნების მოთხოვნით მივიდა.

თუმცა, როგორც მკვლელობაში ბრალდებულის ახლობლები აცხადებენ, მას სახლში 1000 ლარამდე თანხა ჰქონდა.  გარდაცვლილის ახლობლები კი მკვლელობას მის ორიენტაციას უკავშირებენ.

ბექა ბერიანი ნაქირავებ ბინაში მოკლული იპოვეს, მკვლელმა კვალის დაფარვის მიზნით, მკვლელობის შემდეგ სახლში ხანძარი გააჩინა და მოკლულის ტელეფონი, ასევე კვალის დაფარვის მიზნით, თან წაიღო.