თუ რომელიმე რაიონში მეორე ტური დაინიშნება, ტრაგედია არ იქნება,– ამის შესახებ საქართველოს პრემიერ-მინისტრმა,  ირაკლი ღარიბაშვილმა საარჩევნო უბანზე ხმის მიცემის შემდეგ განაცხადა. 

ანაკლიის 32–ე უბანზე საარჩევნო პროცესი ჩაიშალა. საარჩევნო უბანზე უგზო–უკვლოდ დაკარგული გოგიტა აბულაძის ოჯახის წევრები შეიჭრნენ და საარჩევნო ინვენტარი დააზიანეს.

„ერთიანი ნაციონალური მოძრაობის" წარმოამდგენელ ზურაბ ჭიაბერაშვილის თქმით, დიცსა (38-ე უბანი) და არბოში (39-ე უბანი) ირაკლი ღარიბაშვილის ბიძამ, რამაზ ყორანაშვილმა მათ კანდიდატ, ალექსანდრე ჯალაბაძეს შეუთვალა, რომ ბიულეტენების ჩაყრას აპირებს და ხელი არ შეუშალონ მისმა წარმომადგენლებმა.

მთაწმინდის საარჩევნო ოლქის ნომერ მეექვსე საარჩევნო უბანზე საქართველოს პრეზიდენტმა  გიორგი მარგველაშვილმა პირველმა მისცა ხმა და შესაბამისად, როგორც პირველი ამომრჩეველი ჩანაწერთა წიგნშიც დაფიქსირდა. 

"გუშინ საღამოს მოხდა რამდენიმე ინციდენტი, რომელიც კითხვებს ბადებს, გვესმის, რომ ემოციური ატმოსფეროა, მაგრამ ასევე ვიმედოვნებთ, რომ კარგი შესაძლებლობაა მშვიდობიანი არჩევნების ჩატარებისთვის. ველოდებით ნორმალურ გარემოში არჩევნების ჩატარებას",

შინაგან საქმეთა სამინისტრო თბილისში, ფონიჭალაში, "ერთიანი ნაციონალური მოძრაობის" ოთხი მხარდამჭერის ცემის ფაქტთან დაკავშირებით განცხადებას ავრცელებს.

კოალიცია "ქართული ოცნების" კარდაკარის კოორდინატორები, ქუთაისის # 27 და #28 საარჩევნო უბანზე ამომრჩევლის აღწერას აწარმოებენ. ამის შესახებ „აფხაზეთის ხმას“ ქუთაისიდან აცნობეს.

ადგილობრივი თვითმმართველობის არჩევნებზე პირველი საჩივარი დაფიქსირდა. შენიშვნები ბათუმის #66-ე უბანზე დამკვირვებლებმა გამოთქვეს.

"იმედის" დაკვეთით ეგზიტპოლებს თბილისის მასშტაბით კომპანია "ეისითი" ჩაატარებს. "იქნება პროპორციული სიები და მერობის კანდიდატები. პირველადი შედეგი კი "ქრონიკის" რვასაათიან გამოშვებაში გამოცხადდება", - განაცხადა ბაია ცანავამ.

მარტვილის რაიონის სოფელ დოშაყეს მე-16 საარჩევნო უბანში ნიღბიანი შეიარაღებული პირების შეჭრის შედეგად გატაცებული ბიულეტენები ხრამში იპოვეს. როგორც „აფხაზეთის ხმას" განუცხადეს, ლუქის მთლიანობა დარღვეული არ არის, ამიტომ არჩევნები დოშაყეს უბანში ჩატარდება.