2014-09-29 13:51

ჭიდაობის ფედერაციის პრეზიდენტის ლუკა კურტანიძის განცხადებით, იმ სპორტსმენებს შორის, რომლებიც მას უპირისპირდებიან, არიან ისეთებიც, ვინც წინა ხელისუფლების დროს სხვადასხვა რეგიონებში ზონდერებად მუშაობდნენ და ამაში პრემიებსაც იღებდნენ.

კურტანიძემ ეს განცხადება გაზეთ ,,ასავალ-დასავალთან“ საუბრისას გააკეთა:

,,მე დავსვი ეროვნული ნაკრებებიდან იმ მწვრთნელების გათავისუფლების საკითხი, რომლებმაც 2 წლის განმავლობაში ვერანაირ წარმატებას ვერ მიაღწიეს. ამას მოჰყვა განაწყენება და განაწყენებული ადამიანების მხარდამხარ აღმოჩნდნენ ის რევანშისტებიც, რომლებიც წლების განმავლობაში სააკაშვილის რეჟიმს აძლიერებდნენ. მე ვაფრთხილებ ყველას, თუ არ გაჩერდებიან, სახელებით და გვარებით საჯაროდ დავასახელებ იმ სპორტსმენებს, რომლებიც ზონდერებად მუშაობდნენ და სააკაშვილის კრიმინალურ რეჟიმს აძლიერებდნენ!

დიახ, იმათ შორის ვინც მიპირისპირდებიან, არიან სპორსტმენები, ვინც სხვადასხვა რეგიონში ზონდერ-კოორდინატორებად იყვნენ გადანაწილებულნი და ამაში უზარმაზარ პრემიალურ თანხებს იღებდნენ“,- აცხადებს კურტანიძე.

ფედერაციის პრეზიდენტის განცხადებითვე, არიან ისეთებიც, რომლებიც ზონდერები არ ყოფილან, მაგრამ ფულს იღებდნენ პასიურობასა და გაჩუმებაში და სააკაშვილის რეჟიმს ამ ფორმით აძლიერებდნენ.

,,როცა ჩვენ მოვედით და სპორტის სამინისტროს ბიუჯეტიდან მილიონნახევარი ლარი ჩამოეჭრა, ამ სპორტსმენებმა ნაცკოორდინატორობის პრემიები ავტომატურად დაკარგეს. დღეს უკმაყოფილებას გამოხატავენ და ამბობენ - სააკაშვილის დრო ჯობდა, რადგან ჩვენ დიდი ხელფასები გვქონდაო“,- აცხადებს ლუკა კურტანიძე.