2014-08-31 23:57

კვირას ლილოში, ბაზრობასთან მდებარე რესტორანში მომხდარი ჯგუფური ჩხუბის დროს შსს-ს ხუთი თანამშრომელი დაჭრეს. მათგან ერთი ამ დრომდე მძიმე მდგომარეობაშია და რეანიმაციის განყოფილებაში იმყოფება. მას დანამ ფილტვი დაუზიანა.

საავადმყოფოდან ცოტა ხნის წინ გაწერეს მეორე პოლიციელი, რომელსაც ასევე, დანით მიყენებული ჭრილობა ჰქონდა - „აფხაზეთის ხმის“ ინფორმაციით, ხუთივე დაჭრილი პოლიციის თანამშრომელი იყო, კონკრეტულად კი სუს-ის სპეცრაზმის წევრები, რომლებსაც კონფლიქტი რესტორანში მყოფ მოქალაქეებთან მოუვიდათ. წყარო ერთერთი დაჭრილი პოლიციელის ვინაობასაც ასახელებს: ლაშა კ.-ძე.

„რესტორანში დიდი სუფრა იყო, ნათლობას იხდიდნენ. დაკეტილი არ იყო რესტორანი, ანუ წინასწარ რომ შეუკვეთავენ და კეტავენ, ეგრე არ მომხდარა - დიდი რესტორანია. ეს პოლიციელები იქვე ისხდნენ, გვერდით. არ ვიცი, რა მიზეზით, მაგრამ ჩხუბი ატყდა და ლამის ნახევარი რესტორანი ხალხი ჩაერთო. ეს პოლიციელები ჯერ მაგრად სცემეს, მერე ერთმა დანა დააძრო.

დანას ისე ხმარობდა თურმე, რომ პოლიციელებს ხელი არ გაანძრევინა, მერე კი, როცა ესენი დაჭრა, გაიქცა. პოლიცია როცა მოვიდა, ხუთი კაცი დააკავა, მაგრამ ის, ვინც დანას ურტყამდა, გაქცეული იყო. ერთერთი პოლიციელი, რომელიც დაჭრეს და გაწერეს, ჩემი მეზობელია, მისგან ვიცი ეგ ამბავი ასე დაწვრილებით. კაცი დანას ასე ხმარობდეს, ჯერ არ მინახავსო, ასე თქვა...“, - ამბობს დაჭრილი პოლიციელის მეზობელი „აფხაზეთის ხმასთან“.

შსს რესტორანში ჯგუფური ჩხუბის ფაქტს ადასტურებს. ადასტურებს იმასაც, რომ ერთი ადამიანი მსუბუქად დაიჭრა და აცხადებს, რომ ჩხუბის გამო პოლიციამ ხუთი პირი დააკავა, ხოლო დაჭრილი შსს-ს თანამშრომელი არ არის.

შენიშვნა: სტატიაზე მიბმული ფოტო არაა გადაღებული შემთხვევის ადგილზე და აღწერილ ინციდენტს მხოლოდ თემატურად უკავშირდება