ვიცე ადმირალი, უკრაინის სამხედრო-საზღვაო ძალების მეთაური სერგეი გაიდუკი რუსეთის მხრიდან ომის წარმართვის "ასიმეტრიული მეთოდის" გამოყენებას არ გამორიცხავს. ამის შესახებ მან ოდესაში გამართულ ბრიფინგზე განაცხადა.
მისი თქმით, აღნიშნული მეთოდი, შესაძლოა, რამდენიმე მიმართულებად დაიყოს: მოსახლეობის წინააღმდეგ ინფორმაციულ-ფსიქოლოგიური ომის წარმოება, ინფორმაციულ-ფსიქოლოგიური აქციების მოფიქრება, რომელიც რეგიონში დესტაბილიზაციას შეუწყობს ხელს.
"არაა გამორიცხული დივერსიულ-სადაზვერვო ჯგუფების მოქმედება, პრორუსულად განწყობილი დაქირავებულების მოქმედებები, რომლებიც ტერორისტულ და დივერსიულ აქტებს მოაწყობენ ობიექტებზე", - აღნიშნა ვიცე-ადმირალმა.
მისი თქმით, ასეთ დროს ყველაზე მთავარი მოწინააღმდეგის დროულად აღმოჩენა იქნება, რის შემდეგაც მათ წინააღმდეგ მოქმედება გაადვილდება. ამასთან, ვიცე-ადმირალმა "გადაჭარბებული" უწოდა სოციალურ ქსელში გავცელებულ ინფორმაციას, თითქოსდა რუსებს განძრახული აქვთ ოდესამდე ჩავიდნენ:
"არ მგონია, რომ ასე შორ მანძილზე წამოვიდნენ, ამიტომ არ ღირს ვინმე რიგითის ციტატაზე დიდი ყურადღების გამახვილება", - თქვა მან და დაამატა, რომ ზღვიდან დესანტის გადმოსხმის მცდელობის შემთხვევაში მტრის წინააღმდეგ ყველა სამხედრო რესურსი იქნება მიმართული, დაწყებული ჯავშანტექნიკით და ავიაციითა და საზღვაო ძალების ხომალდების გამოყენებით დასრულებული.