-
2016-02-18 05:54
უეფამ, შესაძლოა, მოსკოვის ,,ლოკომოტივის" ნახევარცველს დიმიტრი ტარასოვს დისკვალიფიკაცია მისცეს. მოგეხსენებათ, ევროპა ლიგის 1/16 ფინალურ მატჩში ,,ფენერბახჩეს" წინააღმდეგ გასვლითი მატჩის დასრულებისას ტარასოვი მოედნიდან პუტინის გამოსახულებიანი მაისურით გავიდა.
"საქმე გვაქვს დისციპლინური რეგლამენტისა დარღვევასთან და აშკარა პროვოკაციასთან. ტარასოვი, შესაძლოა მინიმუმ, 10 მატჩით გუნდს ჩამოაშორონ. სანქციები შეეხება მოსკოვის ,,ლოკომოტივსაც", რომელმაც მსგავსი ფაქტი დაუშვა" - იტყობინება უეფას ოფიციალური საიტი.
ტარასოვის ქმედება ექვემდებარება უეფას დისციპლინარული კანონმდებლობის მე-14 მუხლს, რომლის მიხედვითაც, "ნებისმიერი პირი, რომელიც გააღიზიანებს ან შეურაცხყოფას მიაყენებს სხვა ადამიანის ან ადამიანთა ჯგუფის ღირსებებს, რაიმე ქმედებით... დაექვემდებარება დისკვალიფიკაციას არა უმცირეს 10 მატჩისა". ეს პუნქტი აგრეთვე კრძალავს ყველანაირ რელიგიურ, პოლიტიკურ და იდეოლოგიურ პროპაგანდას.
"ფენერბახჩესთან" მატჩის დასრულების შემდეგ დიმიტრი ტარასოვმა კლუბის მაისური გაიხადა, შიდა მაისურზე კი პუტინის პორტრეტთან ერთად იყო წარწერა: "ყველაზე თავაზიანი პრეზიდენტი". თავად ფეხბურთელმა განაცხადა, რომ მას უყვარს თავისი ქვეყნის პრეზიდენტი და ეს ჟესტი მისი მხარდაჭერის გამოხატულება იყო.
შეგახსენებთ, რომ რუსეთსა და თურქეთს შორის კონფლიქტი სირიის კრიზისის ფონზე რამდენიმე თვის წინ გაღვივდა და განსაკუთრებით გამწვავდა თურქეთის ჰაერსაწინააღმდეგო თავდაცვის ძალების მიერ რუსული სამხედრო თვითმფინავის ჩამოგდების შემდეგ.
წყარო: "სარბიელი.ჯი"
