სენაკში ბაზრის დაწვის გამო დაზარალებულმა მოვაჭრეებმა გზა გადაკეტეს. როგორც ისინი აცხადებენ, თუ ხელისუფლება მათ კომპენსაციის გაცემის პირობას არ მისცემს, აქციები პერმანენტულ სახეს მიიღებს.
მოვაჭრეები ზარალის ანაზღაურებას ითხოვენ. როგორც ისინი აღნიშნავენ, ბანკებიდან სესხი აქვთ აღებული, ხანძრის შედეგად კი საქონელი სრულად დაეწვათ და სესხის გადახდას ვერ მოახერხებენ. აქციის მონაწილეებს სენაკის გამგებელი შეხვდა და განუცხადა, რომ კომპენსაციების შესახებ მას შემდეგ იქნება საუბარი, რაც ზარალი დაითვლება.
ადგილობრივი ხელისუფლება მოვაჭრეებს ასევე ბანკებთან შუამდგომლობას სთავაზობს, რათა სესხების პროცენტების დაფარვა გადავადდეს. დაზარალებულები აცხადებენ, რომ ხანძრის გაჩენა განგებ მოხდა, რადგან ცეცხლი ერთდროულად ოთხ სხვადასხვა ადგილს მოეკიდა. იგივეს ეჭვობს სენაკის ბაზრის დირექტორი მურად შამათავაც. იგი არ გამორიცხავს, რომ მომხდარი შესაძლოა, მის პოლიტიკურ საქმიანობას უკავშირდებოდეს. შამათავა ნინო ბურჯანაძის “დემოკრატიული მოძრაობის” სენაკის ორგანიზაციის ლიდერია. სენაკის ცენტრში ძლიერი ხანძარი გუშინ საღამოს გაჩნდა. მთლიანადაა დამწვარი ქალაქის მთავარი ბაზარი. 3 000 კვადრატულ მეტრზე მდებარე ტანსაცმლის მაღაზიები, სტომატოლოგიური კლინიკა, რამდენიმე მარკეტი და სხვა ტიპის კომერციული ობიექტები სრულად განადგურდა. ზარალი რამდენიმე მილიონ ლარს აჭარბებს. სენაკის ბაზარში გაჩენილ ცეცხლს სამეგრელო-ზემო-სვანეთის მხარის ყველა სახანძრო ბრიგადა 3 საათის განმავლობასი აქრობდა. ადგილზე იმყოფებოდა მხარის გუბერნატორი ლევან შონიაც
