რამდენიმე დღის წინ რიკოთის უღელტეხილზე დატრიალებულმა ტრაგედიამ 14 წლის თამარ ფერაძის სიცოცხლე შეეწირა.
ავტოავარიის მიზეზი სატვირთო ავტომობილის გაუმართაობა გახდა. ტრაილერს მუხრუჭებმა უმტყუნა, მძღოლმა სატვირთო მანქანა ვერ დაიმორჩილა, ის ტრაილერს დაეჯახა, შემდეგ კი ავტობუსს.
შეჯახების შედეგად ამოტრიალებული ავტობუსი სატვირთომ რამდენიმე მეტრზე ათრია.
ავტობუსში ვოკალური ანსამბლის „ლილეოს“ 15 წევრი და მათი მშობლები იმყოფებოდნენ. ისინი ბულგარეთში, ფესტივალზე მიემგზავრებოდნენ.
„თამარი სულ უკან იჯდა, ავტობუსში ბოლოს სკამები რომ არის, იქ. საოცარი იცით რა არის? ფანჯრის მხარეს, სადაც პირველად დაგვარტყა ტრაილერმა, სანამ გაგვისწრებდა და გადაგვაყირავებდა, იმ ადგილას მჯდომი ბავშვი უვნებელი გამოვიდა ავტობუსიდან.
გვერდზე ეჯდა ის ბავშვი, რომელიც გარდაიცვალა. როგორც ჩანს, როცა გადავტრიალდით და გვათრია ამ ტრაილერმა, შუშა ჩაიმსხვრა და ბავშვი გადმოვარდა, ავტობუსის ქვემოთ იყო მოქცეული“,- „პირველ რადიოსთან“ საუბარში განაცხადა „ლილეოს“ ხელმძღვანელმა, ნატალია კულდონაშვილმა.