2014-07-18 13:09

ზაფხულის დადგომასთან ერთად დედაქალაქში გველებზე გამოძახების შემთხვევამ იმატა. ერთ-ერთი ბოლო გამოძახება ორთაჭალიდან იყო, სადაც კერძო სახლის ეზოში ერთმეტრიანი გიურზა ნახეს.

მოსახლეობამ გველის დაჭერა საკუთარი ძალით ვერ შეძლო და საგანგებო სიტუაციის სამსახურს გამოუძახეს.

საგანგებო სიტუაციების სამსახურის უფროსის, თემურ გიორგაძის თქმით,  ბოლო სამ თვეში გველებზე გამოძახების 600-მდე  შემთხვევა დაფიქსირდა, თუმცა  აღმოჩენილი გველების უმეტესობა უწყინარი იყო და მხოლოდ 2 აღმოჩნდა შხამიანი.

ექიმ-ტოქსიკოლოგის, სოსო კუტუბიძის თქმით, მნიშვნელობა არ აქვს გველების ნაკბენი შხამიანი იქნება თუ არა, ყველა შემთხვევაში დაშავებულმა ექიმს უნდა მიმართოს.

„პირველ რიგში, ავადმყოფი უნდა დაწვეს ანუ იყოს ჰორიზონტალურ მდგომარეობაში, დიდი რაოდენობით სითხე მიიღოს და შემდგომ აუცილებელია,  ექიმს მიმართოს. ბინის პირობებში მკურნალობა ცოტა ძნელია, მაგრამ თუ არის საშუალება, უნდა მიიღოს საგულე საშუალება. თვითმკურნალობა, მაგალითად ნაკბენის მიდამოს დაზელვა და ა.შ. არ შეიძლება.

მხოლოდ ცივყინულიანი რამის დადებაა შესაძლებელი, სხვა ყველაფერი კატეგორიულად აკრძალულია. ძალიან ხშირად თვითმკურნალობას მიმართავენ ხოლმე, რომელსაც მერე გართულებები მოსდევს და უფრო მძიმე სამკურნალო ხდება, ამიტომ ჯობია კბენისთანავე ექიმს მიმართონ.

გველისაგან თავის დაცვის ერთ-ერთი საშუალება ისაა, რომ გველი არ უნდა გავაბრაზოთ, ფეხი არ დავადგათ, ისეთ ადგილებში არ უნდა ვიაროთ, სადაც შეიძლება ქვეწარმავალი იყოს, განსაკუთრებით საშიშია ღამე ბუჩქნარებში და ბალახებში სიარული“, - აცხადებს კუტალაძე.

 „რეზონანსი“