"ბიძინა ივანიშვილი ეჭვით არის შეპყრობილი ყველას მიმართ. ის არათუ ოპოზიციას, არამედ საკუთარი პარტიის წევრებს არ ენდობა", - განაცხადა სევდია უგრეხელიძემ დღევანდელ ბრიფინგზე.
მისი თქმით, საკრებულოში თანამდებობების გადასანაწილებლად მათთან არანაირი კონსულტაციები არ მიმდინარეობს.
მან მერიაში ხელისუფლების მიერ განსახორციელებელ სავარაუდო წმენდაზეც ისაუბრა. ამის დასტურად უგრეხელიძემ თენგიზ შერგელაშვილის მიერ გაკეთებული განცხადება მოიყვანა სავალდებულო ატესტაციასთან დაკავშირებით.
როგორც უგრეხელიძემ დღეს განაცხადა, საკრებულოს თავმჯდომარის ორი მოადგილის პოსტზე "ქართული ოცნება" ისევ თავის წევრს დანიშნავს, სავარაუდოდ, საკრებულოს ოპოზიციას არც კომისიის თავმჯდომარის პოსტებს შესთავაზებენ.
საკრებულოს 11 კომისია ეყოლება და ამ კომისიების თავმჯდომარედ ოპოზიციის წარმომადგენელი არ იქნება.
უგრეხელიძის განცხადებით, როდესაც "ნაციონალურ მოძრაობას" საკრებულოში უმრავლესობა ჰქონდა, თავმჯდომარის მოადგილის ორი პოსტი სპეციალურად ოპოზიციისთვის შექმნეს, ასევე ორი კომისიის თავმჯდომარე ოპოზიციის წარმომადგენელი იყო.