2014-06-23 08:54

გამოცემა TSpress ფოთის მაჟორიტარ დეპუტატს, საპარლამენტო უმრავლესობის წევრს ეკა ბესელიას უჩივის. საჩივარს სასამართლო ფოთში დღეს განიხილავს. ინტერნეტგამოცემამ სასამართლოს მას შემდეგ მიმართა, რაც ფოთის მაჟორიტარისა და მისი ბიუროს მიერ, გამოცემამამ კომენტარსა და ინფორმაციის მიწოდებაზე უარი არაერთხელ მიიღო.

გამოცემა, ამჯერად, სასამართლოს გზით, მაჟორიტარის ბიუროსთვის ბიუჯეტიდან გამოყოფილი ლიმიტირებული თანხის ხარჯვის დოკუმენტაციის გაცემას ითხოვს, რაზეც ეკა ბესელიას ბიურომ უარი განაცხადა.

"ასეთი მითითება მაქვს უფროსებისგან, რომ TSpress-ს პასუხი არ გავცეთ!" - განუცხადა გამოცემას ფოთის მაჟორიტარ ეკა ბესელიას ბიუროს თანამშრომელმა, ნანა ვეკუამ.

ბესელიას ბიუროს მიერ საქმიანობის შესახებ ინფორმაციაზე უარის თქმა, პირველი შემთხვევა არ ყოფილა. მათ გასულ წელსაც არ მოისურვეს გამოცემასთან თანამშრომლობა.

TSpress-ს ბოიკოტი თავად ეკა ბესელიამ მას შემდეგ გამოუცხადა, რაც ინტერნეტგამოცემის რედაქტორმა, ელისო ჯანაშიამ, გასული წლის აპრილში, იმჟამინდელ პრემიერ-მინისტრ ბიძინა ივანიშვილს, ეკა ბესელიას მიერ თვითმმართველობის საქმიანობაში უხეში ჩარევის შესახებ კითხვა დაუსვა და მაჟორიტარის მამხილებელი სტატიები გამოაქვეყნა.

ბესელია და მისი ბიუროს უფროსი ზურა ჩაჩუა, TSpress-ის ჟურნალსიტისათვის საკმაოდ უხეში ფორმით მიმართვასა და ბიუროს მისაღებში მოქალაქეებთან შეხვედრის გადაღების აკრძალვასაც არ ერიდებოდნენ "სამუშაო ოთახია და ხელს გვიშლი მუშაობაში!"- ასე მიმართა ჩაჩუამ საჯარო შენობაში ჟურნალისტს, რომელიც იქ პროფესიულ მოვალეობას ასრულებდა, ბესელიამ კი მას კამერის "მოცილება" მოთხოვა.

წყარო