2014-06-20 23:48

"საქმე გვაქვს გუნდთან, რომელიც ჩვილი ბავშვის მკვლელობას გვაბრალებდა არჩევნებამდე ერთი დღით ადრე, ამათგან მილიონი დოლარის გადმოტანის დაბრალება რა გასაკვირია", - განაცხადა პავლე კუბლაშვილმა "რეაქციის" ეთერში.

მან უსაყვედურა ირაკლი სესიაშვილს და შეახსენა, რომ მას არცერთი შეკითხვა არ გასჩენია პროკურატურასთან, როცა ისინი საქმეებს კერავდნენ: "მაგალითად, სესიაშვილს ერთხელაც არ დაუსვამს შეკითხვა პროკურატურისთვის იმასთან დაკავშირებით, როგორ გადაძვრა შალვა თათუხაშვილი არარსებული გისოსებიდან.

თქვენ ერთხელაც არ დაინტერესებულხართ ბათუმის ტელეკომპანია "25-ე არხის" დირექტორის განცხადებით იმის თაობაზე, რომ დღევანდელი მთავარი პროკურორი მას "აკაჩავებდა", რათა ხელი დაედო კონკრეტული პირებისთვის, დღეს კი შენ (მიმართავს სესიაშვილს, -რედ.), პარლამენტის თავდაცვისა და უშიშროების კომიტეტის თავმჯდომარე, მოდიხარ აქ და ამბობ, რომ კი, უდანაშაულობის პრეზუმპცია მნიშვნელოვანია, მაგრამ ზურა ჯაფარიძე მაინც დამნაშავეა... 

შენი წყარო მითხარი, ირაკლი, შენ ვინ გითხრა და საიდან მოიტანე? ის კი არა, რომ იპნ-ზე წაიკითხე ვიღაცის ნათქვამი ვიღაცისთვის, აი, კონკრეტულად შენ ვინ გითხრა? მილიონი დოლარი ზურას თუ უპოვეთ, მეც მითხარი, იმიტომ რომ იმედია, მეგობრულად რამეს მოიფიქრებს...

თქვენი შემომწირველები ვინ არიან დღეს? გაიცემა დიდი რაოდენობით პრემიები, რომლებიც აკეთებენ შემოწირულობებს, თქვენი შემომწირველი არის კახა კალაძის ბანკი და თქვენ რა დაფინანსებაზე და შავ ფულზე ლაპარაკობთ საერთოდ, როცა ერთი ოლიგარქის დაფინანსებული შავი ფულით ხართ მოსული?..", - თქვა პავლე კუბლაშვილმა.