ჩვენი გუნდი უზრუნველყოფს მეორე ტურის მშვიდ გარემოში ჩატარებას, – ამის შესახებ "ქართული ოცნების" შტაბის ხელმძღვანელმა კახა კალაძემ დღეს გამართულ პრესკონფერენციაზე განაცხადა.
მისი თქმით, ცესკო-ს პირველადი მონაცემებით "ქართული ოცნების" კანდიდატები მთელი ქვეყნის მასშტაბით ლიდერობენ.
"ქართული ოცნების" კანდიდატები მთელი ქვეყნის მასშტაბით ლიდერობენ, მათ შორის იმ ქალაქებში, სადაც მეორე ტური დაინიშნა, პრაქტიკულად, საკრებულოში უმრავლესობა ჩვენი წარმომადგენლები არიან - 1049 მაჟორიტარული მანდატიდან 811 დეპუტატი გაიყვანა "ოცნებამ", არჩეული 128 ადამიანი საინიციატივო ჯგუფის სახელით გავიდა", - განაცხადა კახა კალაზემ.
მისივე განცხადებით, ჯამში, ოპოზიციური პარტიების არჩეული მაჟორიტარების რაოდენობა შეადგენს 238-ს, საიდანაც მხოლოდ 64-ია მთავარ ოპოზიციურ ძალაზე პრეტენზიის მქონე "ნაციონალური მოძრაობის" დეპუტატი.
"მაჟორიტარული და სიით შემადგენლობის ჩათვლით, ქვეყნის მაშტაბით "ქართულმა ოცნებამ" 1400-მდე მანდატი მოიპოვა. დემოკრატიულობის მაღალი ხარისხის მაჩვებებლია ის, რომ არჩევნების მეორე ტურში ლიდერ პოლიტიკურ ძალას 6 ოპოზიციური პარტია დაუპირისპირდება. 15 ივნისის არჩევნები არის რეალური თვითმმართველობის ხალხისთვის გადაცემის დასაწყისი", - განაცხადა კალაძემ.
მისივე თქმით, ძალიან მნიშვნელოვანია დიპლომატების შეფასება.
"საერთაშორისო საზოგადოებამ დადებითად შეაფასა არჩევნები, საელჩოების მიერ გავრცელებული გაცხადების თანახმად, 15 ივნისის არჩევნები თვითმმართველობის გაძლიერებისკენ გადადგმული ნაბიჯია. ჩვენი გუნდი უზრუნველყოფს მეორე ტურის მშვიდ გარემოში ჩატარებას. მადლობა ყველა ამორჩეველს, ვინც დააფიქსირა თავისი არჩევანი. მეორე ტურისთვის გავაქტიურდეთ და არ დავუშვათ, რომ ჩრდილი მიადგეს ჩვენს საერთო გამარჯვებას", - განაცხადა კალაძემ.
