2014-06-13 22:37

გუშინ, ოზურგეთის რაიონულ სასამართლოში ბლოკის "ქართული ოცნება" ლანჩხუთის გამგებლობის კანდიდატის, ამომრჩევლის მოსყიდვაში ბრალდებულ ზაზა ურუშაძის  რეგისტრაციის გაუქმების საკითხს განიხილავდნენ, რასაც „პატრიოტთა ალიანსის" ლანჩხუთის გამგებლობის კანდიდატი ბარნაბ (ბორის) ჭყონია ითხოვდა. ინფორმაციას ამის შესახებ „გურიანიუსი“ ავრცელებს.

პროცესის დაწყებამდე რამდენიმე წუთით ადრე გაირკვა, რომ ჭყონიას მიერ სარჩელში დასახელებული მოწმეები, ზაზა ურუშაძის მოწმეებად გამოვიდოდნენ, რაც „პატრიოტთა ალიანსის" წარმომადგენლებმა ზეწოლად შეაფასეს.

დარეჯან ბაღდავაძემ, "გურია ნიუსის" კითხვაზე როგორ აღმოჩნდა ის ურუშაძის მოწმედ, როცა ჭყონიას ჰყავდა დასახელებული, მხრების აჩეჩვით უპასუხა.

აღსანიშნავია ისიც, რომ ჭყონიას მოწმე _ მზევინარ ქანთარია სასამართლოს შესასვლელში ტიროდა.  გამოცემის მიერ დასმულ კითხვაზე - ხომ არ ჰქონდა მასზე ზემოქმედებას ადგილი, ქანთარიამ უპასუხა რომ _ არა.

სასამართლომ ურუშაძის რეგისტრაციიდან მოხსნის მოთხოვნა არ დააკმაყოფილა. მოსამართლემ გადაწყვეტილების გამოტანისას აღნიშნა, რომ ბრალდების დასამტკიცებლად, რომელიც ამომრჩევლის მოსყიდვას ეხებოდა, საკმარისი მტკიცებულებები არ იყო წარმოდგენილი.

"გურიანიუსი"