2015-03-18 00:17

ცნობილი მსახიობი და მომღერალი ბუბა კიკაბიძე უკრაინაში იმყოფება და კონცერტებს მართავს. ლვოვსა და კიევში კონცერტებმა სრულ ანშლაგში ჩაიარა. 

კიევში ვახტანგ კიკაბიძემ ცნობილი უკრაინული სიმღერა სახელდახელოდ ქართულად გადათარგმნილადაც შეასრულა და უკრაინულადაც. უკრაინულ ვარიანტს დარბაზი აჰყვა, ხოლო სიმღერის დასრულების შემდეგ მაყურებელი დიდხანს უკრავდა ტაშს:

"მე მინდა გითხრათ მადლობა და მინდა გითხრათ, რომ ყველაფერი კარგად იქნება. ეს ყველაფერი გაივლის, როგორც ცუდი სიზმარი. ჩვენ ისევ გავალთ ქუჩაში, ვისეირნებთ და ვიმღერებთ კიდეც...", - უთხრა ვახტანგ კიკაბიძემ დარბაზში შეკრებილებს.

ვახტანგ კიკაბიძის პროდიუსერის განცხადებით, საქველმოქმედო კონცერტები უკრაინის არმიის მხარდაჭერის მიზნით საქართველოშიც ჩატარდება.

შეგახსენებთ, დღეს ვრცელდებოდა არასწორი ინფორმაცია იმის შესახებ, თითქოს ვახტანგ კიკაბიძემ უკრაინაში პოლიტიკური თავშესაფარი მოითხოვა, რაც თავად მომღერალმა და მსახიობმა არ დაადასტურა: "მე მიყვარს უკრაინა, მაგრამ საქართველოს არცერთ სხვა ქვეყანაში არ გავცვლი", - განაცხადა ვახტანგ კიკაბიძემ.