9 მაისის დღესასწაულთან დაკავშირებით ბორჯომის მინუციპალიტეტის გვერდზე „ფეისბუქში“ გამოქვეყნდა ამ ეგიდით გამართული ღონისძიებების ამსახველი ფოტოები და აღწერა.
ერთ-ერთ ფოტოზე ჩანს, რომ ქალაქის ცენტრში სტალინის პორტრეტებით მორთული რამდენიმე მანქანა გადაადგილდება, ამასთან, მანქანებზე სტალინის უზარმაზარი პორტრეტები ზუსტად ისეა დამაგრებული, როგორც სსრ კავშირის დროს, საზეიმო მსვლელობისას.
აღწერაში ნათქვამია:
„ფაშიზმზე გამარჯვების 69-ე წლის თავი ბორჯომელებმა ტრადიციულად იზეიმეს. სამწუხარო მხოლოდ ის არის, რომ იმ ადამიანების შემადგენლობა, რომლებმაც ეს ბრწყინვალე გამარჯვება მოგვიპოვა თანდათან მცირდება.
შინმოუსვლელთა მემორიალთან დილის 11 საათზე თავი მოიყარეს მებრძოლებმა, მათმა ოჯახის წევრებმა და იმ ადამიანებმა ვისაც კარგად აქვს გაანალიზებული ამ დღის მნიშვნელობა.
ვეტერენებს დღესასწაული მიულოცა ბორჯომ-ბაკურიანის მირტოპოლიტმა მეუფე სერაფიმემ, რომელმაც დეტალურად გაანალიზა დიდი სამამულო ომის მრისხანე წლები და ქართველთა უდიდესი წვლილი ამ გამარჯვებაში“.
შეგახსენებთ, რომ ბორჯომის მუნიციპალიტეტი ერთ-ერთი ყველაზე მეტად დაზარალებული რეგიონი იყო რუსეთ-საქართველოს ბოლო ომის დროს, 2008 წლის აგვისტოში, როცა რუსმა ოკუპანტებმა ბორჯომ-ხარაგაულის უნიკალური ტყე-პარკის ტერიტორიაზე ცეცხლგამჩენი ჭურვებით ხანძარი გამოიწვიეს და ეკოციდი მოაწყვეს.