2014-06-03 22:07

რამდენიმე წუთის წინ მაშველებმა წარმატებით დაასრულეს ოპერაცია მარტვილის მუნიციპალიტეტის სოფელ გაჭედილში - 11-ვე მოზარდი სახიფათო ზონიდან სამშვიდობოსაა გაყვანილი.

ამასთან, თავს კარგად გრძნობს მაშველი, რომელიც მდინარემ გაიტაცა და ნაპირზე გამოსვლა მოშორებით მოახერხა. ის უკვე შეუერთდა მაშველთა ჯგუფს. შეგახსენებთ, რომ 11 მოსწავლე საშიშ ადგილას ჩარჩა მას შემდეგ, რაც ისინი ერთად გადავიდნენ ნავებიდან, ნავები კი მოულოდნელად მოვარდნილმა წყლის ნაკადმა გაიტაცა.

სავარაუდოდ, მოსწავლეები ნავებიდან ფოტოების გადასაღებად გადავიდნენ, რასაც მდინარე აბაშის ადიდება დაემთხვა. სკოლის მოსწავლეები, ძირითადად, რუსთავიდან არიან. შემთხვევის ადგილზე გამოძახებიდან რამდენიმე წუთში მივიდნენ მაშველები.