-
2014-06-03 21:45
გიგი უგულავა პარტიის დასაფინანსებლად შექმნილი დანაშაულებრივი სქემის თაობაზე ფინანსთა სამინისტროს საგამოძიებო სამსახურის განცხადებას "ტაკიმასხარაობას" უწოდებს..
"ნაციონალური მოძრაობის" თბილისის ორგანიზაციის ხელმძღვანელი აცხადებს, რომ დაკავებული გიორგი ღონიაშვილი მისი ქვისლია და მას არანაირი კავშირი არ აქვს ,,ნაციონალურ მოძრაობასთან". უგულავას განცხადებით, ეს ნაბიჯი პარტიის დისკრედიტაციისკენ არის მიმართული.
"დღეს მე, ისევე, როგორც მთელმა საზოგადოებამ, ვიხილე მორიგი ტაკიმასხარაობა, დადგმული ფინანსური პოლიციის მიერ. როგორც ჩანს მუშაობა დაიწყო იმ გეგმამ, რომელიც ბატონმა ღარიბაშვილმა დააანონსა, როცა თქვა, რომ ცხელი ზაფხული იქნება და რომ არც ერთ რაიონში "ნაციონალურ მოძრაობას" არ გაამარჯვებინებენ.
არჩევნებამდე 10 დღით ადრე, აბსოლუტურად დაუსაბუთებლად მათ გადაწყვიტეს მთავარი ოპოზიციური პარტიის (რომლის მიმართ პირადად ღარიბაშვილს და ივანიშვილს დიდი ძრწოლა აქვთ და როგორც ჩანს, დილაობით სარკეში რომ იხედებიან ისევ "ნაციონალური მოძრაობა" ელანდებათ) ამგვარი მეთოდებით დისკრედიტაცია.
დაკავებული გიორგი ღონიაშვილი არის ჩემი ქვისლი და მეგობარი, მაგრამ მას ერთიან "ნაციონალურ მოძრაობასთან" არანაირი კავშირი არ გააჩნია. ისაა პოლიტიკისგან შორს მდგომი ადამიანი. მას აქვს თავისი საქმე და ეწევა ამ საქმეს. მისი დაკავშირება "ნაციონალური მოძრაობის" საქმიანობასთან არის საზოგადოების შეცდომაში შეყვანა, დეზინფორმაცია და ტყუილი და მიზნად ისახავს პირადად ჩემს და პარტიის დისკრედიტაციას", - განაცხადა უგულავამ.