ვარკეთილის მესამე მასივში მცხოვრები შეზღუდული შესაძლებლობების მქონე მამაკაცი და მისი მეუღლე სასტიკად აწამეს, შემდეგ კი, გაძარცვეს. „ექსპრესნიუსის“ ინფორმაციით, შემთხვევა სამი დღის წინ მოხდა.
როგორც “ექსპრესნიუსისთვის” გახდა ცნობილი, მძარცველები, რომლებსაც ნიღბები ეკეთათ, დაზარალებულის საცხოვრებელ სახლში დაახლოებით, დილის 7 საათზე შეიჭრნენ.
მეზობლების თქმით, მამაკაცი, რომელსაც დამოუკიდებლად გადაადგილება უჭირს, სასტიკადაა ნაცემი. ნაწამებია მისი მეუღლეც, რომელსაც მათივე ინფორმაციით, მძარცველებმა თავი უნიტაზში ჩააყოფინეს.
“ნიღბებით შეიჭრნენ სახლში. მამაკაცს დამოუკიდებლად გადაადგილება უჭირს, ის სასტიკადაა ნაწამები, სცემეს. მის მეუღლეს კი უნიტაზში აყოფინეს თავი და ფიზიკური შეურაცხყოფაც მიაყენეს. მძარცველებმა სავარაუდოდ, სახლიდან ოქრო და ძვირადღირებული ნივთები წაიღეს”, – განუცხადეს “ექსპრესნიუსს” მეზობლებმა.
შინაგან საქმეთა სამინისტროს საზოგადოებასთან ურთიერთობის სამსახურის ინფორმაციით, ვარკეთილის მესამე მასივში მომხდარ ფაქტზე გამოძიება ძარცვის მცდელობის მუხლით მიმდინარეობს. შინაგან საქმეთა სამინისტროში “ექსპრესნიუსის” მიერ გავრცელებულ ინფორმაციას იმის შესახებ, რომ ვარკეთილის მესამე მასივში ცოლ-ქმარი აწამეს არ ადასტურებენ.
შსს ასევე, უარყოფს ინფორმაციას იმის შესახებ, რომ მამაკაცი შეზღუდული შესაძლებლობების მქონე პირია.
"ექსპრესნიუსის" მიხედვით