-
2014-10-25 21:10
ესპანეთის ხელისუფლება და სამართალდამცველები მზად არიან, ცოტა ხანში რუსეთს გადასცეს ცნობილი ე.წ. კანონიერი ქურდი ზახარ კალაშოვი, იგივე „შაქრო-მალადოი“. ამის შესახებ El Mundo იუწყება.
როგორც ცნობილი გახდა, კალაშოვის ექსტრადირება მომავალი კვირის დასაწყისში იგეგმება. აქამდე ესპანეთის ხელუსფლება უგულებელყოფდა რუსული მხარის მოთხოვნას კალაშოვის გადაცემის შესახებ.
შეგახსენებთ, რომ შაქრო კალაშოვი რვა წლის წინ დუბაიში დააკავეს დუბაიში, ესპანეთის ხელისუფლების მოთხოვნით. ესპანელი პოლიციელები მის დაკავებას 2005 წელს გეგმავდნენ, როცა სპეცოპერაციის ფარგლებში ოცდაათამდე „ავტორიტეტი“ დააკავეს, თუმცა, მაშინ კალაშოვმა გაქცევა მოახერხა.
მსგავსი ოპერაცია ესპანეთში 2008 წელსაც ჩატარდა, მაშინ 20 ადამიანი დააკავეს, მათ შორის ვიტალი იზგილოვი, იგივე „ვიტალიკი“ - შაქრო კალაშოვთან დაახლოებულ პირთაგან ერთერთი.
არაოფიციალური ინფორმაციით, საქართველოს წინა ხელისუფლებას და ესპანეთის ხელისუფლებას შორის არსებობდა შეთანხმება, რომ ესპანეთში თავისუფლების აღკვეთის შემდეგ შაქრო კალაშოვს საქართველოს ხელისუფლებას გადასცემდნენ, თუმცა, უცნობია, მოითხოვს თუ არა საქართველოს მოქმედი ხელისუფლება კალაშოვის გადაცემას საქართველოში მისი გასამართლების მიზნით.