2014-10-18 13:01

ყაზბეგის ქუჩაზე მოხდარი ორმხრივი სროლის დროს, რაც დაზარალებულის მიერ ადგილზე პოლიციის გამოძახებას მოჰყვა, საპატრულო პოლიციის ტანამშრომელი და ეჭვმიტანილი დაიჭრნენ. ეჭვმიტანილის მდგომარეობა მძიმეა, პოლიციელს კი ოპერაცია უტარდება. ინფორმაციას შსს ავრცელებს.

თავდაპირველად გავრცელებული ინფორმაცია იმის შესახებ, რომ პოლიციელისთვის გახსნილი ცეცხლის შემდეგ საპასუხო სროლისას აღნიშნულ მისმართზე მცხოვრები მამაკაცი გარდაიცვალა, ამ დროისთვის არ დასტურდება. როგორც ირკვევა, მამაკაცმა გამოძახებაზე მისულ პოლიციელს სადარბაზოში გაუხსნა ცეცხლი, რასაც პოლიციელის მეწყვილის საპასუხო გასროლა მოჰყვა. "აფხაზეთის ხმის" ინფორმაციით, ეჭვმიტანილი თავშია დაჭრილი და მისი მდგომარეობა უკიდურესად კრიტიკულია, რაც შეეხება პოლიციელს, მან მრავლობითი ჭრილობები მიიღო. 

შსს-ს განცხადების მიხედვით, "ყაზბეგის ქუჩის N 28-ში ლელა ბეჟანიშვილმა საპატრულო პოლიცია გამოიძახა და მის მეუღლე ბიძინა მურადაშვილსა და შვილს შორის წარმოქმნილი კონფლიქტის შესახებ აცნობა. საპატრულო პოლიციის ეკიპაჟი შემთხვევის ადგილზე გამოცხადდა.

საპატრულო პოლიციის თანამშრომლების ადგილზე მისვლისთანავე სადარბაზოში მოქალაქე ბიძინა მურადაშვილის მხრიდან განხორციელდა სროლა. სროლის შედეგად საპატრულო პოლიციის თანამშრომელმა სხეულის მრავლობითი ჭრილობები მიიღო. ბიძინა მურადაშვილის მიერ განხორციელებულ სროლას საპატრულო პოლიციის თანამშრომლის მეწყვილის მიერ საპასუხო გასროლა მოჰყვა. გასროლის შედეგად დაიჭრა მოქალაქე ბიძინა მურადაშვილი.

საპატრულო პოლიციის თანამშრომელს ამ წუთებში რესპუბლიკურ საავადმყოფოში ოპერაცია უტარდება. ბიძინა მურადაშვილი გადაყვანილია ასევე რესპუბლიკურ საავადმყოფოში, მისი ჯანმრთელობის მდგომარეობა მძიმეა. 

მომხდარ ფაქტზე გამოძიებას ქალაქ თბილისის პროკურატურის საგამოძიებო ნაწილი აწარმოებს".

რესპუბლიკურ საავადმყოფოში გადაყვანილი დაჭრილი პოლიციელი შს მინსტრმა ალექსანდრე ჭიკაიძემ მოინახულა.