-
2014-10-08 08:18
დედოფლისწყაროში ოთხი პირია დაკავებული, რომლებსაც ბრალად არასრულწლოვანი გოგონას გატაცება და მასზე ძალადობა ედებათ. წინასწარი ინფორმაციით, 14 წლის გოგონა საკუთარი სახლიდან გაიტაცეს. პოლიციამ გამტაცებელთა კვალს მეოთხე დღეს მიაკვლია.
სავარაუდოდ, გატაცების დაგეგმვა ჯგუფის ერთერთი წევრის მხრიდან 14 წლის გოგოსთან ოჯახის შექმნის სურვილს უკავშირდებოდა. როგორც შსს იუწყება, ექვსმა პირმა გატაცება წინასწარ დაგეგმა. გატაცებული და უკანონოდ თავისუფლებააღკვეთილი გოგონას ოჯახის წევრები ამბობენ, რომ შეიარაღებული პირები გოგონას ოთახში შეიჭრნენ და გაიტაცეს.
მათივე თქმით, გოგონას ძალადობის კვალი აღენიშნება. გატაცებულის მამა ამბობს, რომ გოგონას საძინებელ ოთახში შეჭრილებმა მას პირზე ხელი ააფარეს, თმაში ხელი ჩაავლეს და გაათრიეს, მერე კი მანქანაში შეაგდეს და მიიმალნენ. მისივე თქმით, თუ დამნაშავეები მკაცრად არ დაისჯებიან, მათზე პირადად იძიებს შურს.
ბრალდების დამტკიცების შემთხვევაში ეჭვმიტანილებს 7-დან 10 წლამდე თავისუფლების აღკვეთა ემუქრებათ.