2014-10-06 23:13

ნარკოტიკების შეძენა-შენახვის ბრალდებით დაკავებული თენგიზ ერისთავი თავისუფალია. ამის შესახებ "რუსთავი2"-ს ერისთავის ძმამ გიორგი ერისთავმა განუცხადა. მისივე თქმით თენგიზ ერისთავი თბილისის საქალაქო სასამართლოს დარბაზიდან დღეს გაათავისუფლეს.

მოსამართლემ აღკვეთის ღონისძების ფორმა - პატიმრობა საქმეში აღმოჩენილი ახალი გარემოებების საფუძველზე შეცვალა. რუსთავი2-ის კითხვაზე პასუხის გაცემისგან იმის შესახებ, თუ რა ახალი გარემოებებია აღმოჩენილი, გიორგი ერისთავმა თავი შეიკავა და განმარტა, რომ საზოგადოება ამის შესახებ 29 ოქტომბერს შეიტყობს, როდესაც სასამართლოს სხდომა გაიმართება.

შეგახსენებთ, რომ თბილისში ჩატარებული სპეცოპერაციის შედეგად თენგიზ ერისთავი სამართლადამცველებმა 16 სექტემბერს დააკავეს. ოჯახის წევრებისა და ახლობლების მტკიცებით, მას პოლიციამ ნარკოტიკი ჩაუდო. ეს ბრალდება სხვადასხვა პოლიტიკურმა ფიგურებმაც გაიმეორეს. თენგიზ ერისთავის გათავისუფლების მოთხოვნით ვაკეში, მრგვალ ბაღთან აქციაც გაიმართა. თენგიზ ერისთავი ვაკეში, აბაშიძის ქუჩაზე მოკლული ლაშა მახარაძის მეგობარი იყო. 

"რუსთავი-2"-ის მიხედვით