2014-09-28 00:03

თბილისში, შარდენზე მდებარე ერთერთ ბარში კერძო დაცვის სამსახურის თანამშრომლებმა ახალგაზრდები ცემეს. მათ შორის იყო მალხაზ გულაშვილისა და ნანა გაგუას ვაჟი, რომლის ფოტო "ფეისბუქში" დედამ გამოაქვეყნა.

ნანა გაგუა, ნაცემი ახალგაზრდის დედა "ფეისბუქში" წერს, რომ ის ბარში არ შეუშვეს, უკმეხი სიტყვებით მიმართეს და ფიზიკური შეურაცხყოფა მიაყენეს მას შემდეგ, რაც პრესის მუშაკის ბარათი უჩვენა:

"წუხელ თბილისში, დაწყევლილ შარდენზე, ასე გაუსწორა ჩემს შვილს ერთერთი კერძო დაცვის 6-7 თანამშრომელი. მათ განსაკუთრებით პრეს-ბარათის დანახვა ვერ აიტანეს!", - წერს ნანა გაგუა, რომელიც მედიაკავშირ "ობიექტივის" პირდაპირ ეთერში ტელეფონით ჩაერთო და მომხდარის დეტალებზე ისაუბრა:

"არ შეიძლება ახალგაზრდას, რომელსაც ერთადერთი დარღვევა დაბადებიდან დღემდე ღვედის არგადაკვრაა, ასე დაუმახინჯო ცხოვრება, ამას არ შველის მერე მობოდიშება, რომ ბატონო მალხაზ და ქალბატონო ნანა, ჩვენ ასე არ გვინდოდაო... მე იქ ჩემს შვილს კი არ ვიცავდი მხოლოდ, ყველა ახალგაზრდას ვიცავდი", - განაცხადა ნანა გაგუამ.

"ფეისბუქში", ფოტოს კომენტარებში ზოგიერთმა ჟურნალისტმა აღნიშნა, რომ აღნიშნულ შემთხვევაში დამნაშავეა კერძო დაცვის სამსახური "თორი", რომლის უკან არჩილ გეგენავა და "საქართველოს ბანკი" მოიაზრება.