-
2014-09-16 17:31
ადვოკატი რომეო საჯაია აცხადებს, რომ ,,ქართულმა ოცნებამ“ რაფალიანცების ოჯახში საკუთარი ადვოკატი ჩანერგა, რათა ოჯახის წევრები გაეკონტროლებინა და მიმართულება მიეცა, რომ მკვლელობა ნაციონალებს დაბრალებოდათ.
ადვოკატის ინფორმაციით, ამის დასტურია ის ვიდეო მიმართვა, რომელიც დღეს გავრცელდა და რომელშიც რაფალიანცის ადვოკატი ადასტურებს, რომ ის ,,ქართული ოცნების“ წარმომადგენლებთან მეგობრობის გამო დათანხმდა ამ ნაბიჯის გადადგმას და მათგან სამსახურს ელოდა.
ვიდეოჩანაწერში, რომელიც 2014 წლის თებერვალშია გაკეთებული, ლალი ბიწოშვილი, დეტალურად ყვება, რომ ის ნამდვილად ახდენდა გავლენას გარდაცვლილის ოჯახზე, მშობლებს სთხოვდა ჟურნალისტების ზარები მასთან გადაემისამართებინათ და ა.შ.
“შემთხვევის შემდეგ “ქართულმა ოცნებამ” გადაწყვიტა რაფალიანცების ოჯახში საკუთარი ადვოკატი ჩაენერგათ, გაეკონტროლებინათ ეს ადამიანები და მიმართულება მიეცათ, რომ ეს ყველაფერი “ნაციონალურ მოძრაობას” დაბრალებოდა და “ქართულ ოცნებაზე” ეჭვი არ აეღოთ”, - განაცხადა რომეო საჯაიამ.
ადვოკატის განცხადებას საპარლამენტო უმრავლესობის წევრი გედევან ფოფხაძე გამოეხმაურა. ფოფხაძის თქმით, აღნიშნულ საქმეზე პოლიტიკური ქვეტექსტებით საუბარი თავიდანვე არასწორი იყო.
“თავიდანვე არასწორი იყო ამ მოვლენაზე პოლიტიკური ქვეტექსტის მინიშნება, რომელიც ჩემი თანაგუნდელებისგან მოდიოდა. ეს მათი მხრიდან რა თქმა უნდა, არასწორი ნაბიჯი იყო და ზოგადად ასეთი შეფასებები არასწორია. ახლა, რასაც ეს ადვოკატი აკეთებს, ჩემი აზრით, არანაკლებ შემზარავია, ვიდრე ის, რაც თავის დროზე ჩემმა თანაგუნდელებმა განახორციელეს”, – განაცხადა ფოფხაძემ.