-
2014-07-17 15:08
თავდაცვის ყოფილი მინისტრის, ბაჩო ახალაიას თქმით, მის ოჯახს ემუქრებიან. აღნიშნულის თაობაზე ახალაიამ სასამართლოს სხდომაზე განაცხადა.
„იყო ადვოკატთან ზარი და მუქარა, რომელიც ეხებოდა ასეთ ვითარებას, რომ მე ვიღაცა ციხეში ვერ მომწვდება და ვინც გარეთ მყავს, იმათ მიხედავს. ეს არ არის პირველი და უკანასკნელი.
ეს მუქარები სრულებით არ მადარდებს, რადგან ვიცი, რომ ნებისმიერი მუქარა ამ „ჭიანჭველების“ მხრიდან მხოლოდ მუქარაა და ამის იქით ვერ წავლენ, მაგრამ მინდა, ერთი რაღაც ვთქვა და ამ ხალხს კიდევ ერთხელ გავუმეორო, რომ ჩვენ და ეს ქვეყანა არ ვართ, რაც მათ ჰგონიათ - 90-იანი წლების რუსეთი და 90-იანი წლების ბიძინა ივანიშვილის აზროვნება.
აი, ეს არის პოლიტიკურად ჩასარეცხი ხალხი, რომელიც საქართველომ სამწუხაროდ, ჯერ ვერ ჩარეცხა და ესენი არიან ზუსტად ის მუმიები, რომლებიც აღდგნენ 90-იანი წლებიდან და დღეს კიდევ ჭკუას გვასწავლიან”, - განაცხადა ახალაიამ.
განსასჯელის ასეთი განცხადების შემდეგ მოსამართლემ მოითხოვა ახალაიას განცხადებაზე რეაგირება მოხდეს.
„ვთხოვ პროკურორებს რეაგირება მოახდინონ. თუ საქმეში მონაწილე ადვოკატის მიმართ მუქარა განხორციელდა, როგორც ამას ბატონი ბაჩანა ახალაია ამბობს, ეს მხოლოდ განცხადებად არ უნდა დარჩეს”, - განაცხადა მოსამარლე ბესიკ ბუგიანიშვილმა.