„ჩვენი საქართველოს“ თავმჯდომარე დავით შუკაკიძე აცხადებს, რომ ძალიან კარგად იცნობდა ეროსის და ის არც ერთ შემთხვევაში ცხოვრებას თვითმკვლელობით არ დაამთავრებდა.
„გურია ნიუსთან" საუბარში მან აღნიშნა. რომ დიდი ალბათობით, ეს მკვლელობაა და არა თვითმკვლელობა.
მანვე უარყო საარჩევნო კოორდინატორთა განცხადებები, სადაც ისინი კიწმარიშვილს თანხის გადაუხდელობაში ადანაშაულებდნენ. შუკაკიძის განცხადებით, თანხის გადაუხდელობა მომხდართან არაფერ შუაშია, რადგან ამ შემთხვევაში კაპიკებზე იყო საუბარი.
„გამორიცხულია, იქ კაპიკებზე იყო საუბარი და ამის გამო ეროსი თავს არ მოიკლავდა. ფინანსურად ეროსი დატერორებული იყო წინა და ახლანდელი ხელისუფლების მხრიდან, მაგრამ მას არ უჭირდა. ჰყავდა საკუთარი ძვირადღირებული ავტომობილი, სახლიც ჰქონდა, არ იყო ფინანსურად დუხჭირ მდგომარეობაში“, - ამბობს შუკაკიძე და დასძენს, რომ კიწმარიშვილს ძალიან ბევრი მტერი ჰყავდა.
„მიუხედავად იმისა, რომ ის თვითონ, ბუნებით არ იყო ისეთი ადამიანი, რომ ვინმეს მტერი ყოფილიყო, მას ძალიან ბევრი მტერი ჰყავდა წარსულშიც და ახლაც. ვიცი, რომ ვიღაცეებს, დაახლოებით 5 მილიონი დოლარი ვალი ჰქონდათ მისი “, - ამბობს დავით შუკაკიძე.
