სამაუწყებლო კომპანია "რუსთავი-2"-ის დამფუძნებლის, რუსთავის მერობის ყოფილი კანდიდატის ეროსი კიწმარიშვილის გარდაცვალების გამო აღძრული სისხლის სამართლის საქმე გამოსაძიებლად პროკურატურას გადაეცა.
როგორც ცნობილი გახდა, შსს-მ საქმე სისხლის სამართლის კოდექსის 115-ე მუხლით აღძრა, რაც თვითმკვლელობას ითვალისწინებს. თუმცა, მოგვიანებით გამოსაძიებლად საქმე პროკურატურას გადაეცა. ამ დრომდე ცხედრის აღმოჩენის ადგილას, ყიფშიძის ქუჩაზე, სადაც ეროსი კიწმარიშვილი ცხოვრობდა, კრიმინალისტები არიან მობილიზებული.
შსს-ს ვერსიით, გარდაცვლილი ეროსი კიწმარიშვილის ცხედარი ავტოფარეხში, საკუთარ ავტომანქანაში იპოვეს, სადაც ცეცხლსასროლი იარაღიცაა აღმოჩენილი. კიწმარიშვილის ოჯახის წევრები კომენტარს არ აკეთებენ, რაც შეეხება პრესსამსახურის წარმომადგენელს, თავდაპირველად თიკო ბეჟაშვილმა განაცხადა, რომ ეროსი კიწმარიშვილს თავს დაესხნენ და მოკლეს.