ვარკეთილში მომხდარ მკვლელობაში ეჭვმიტანილი, რომელმაც 45 წლის დისპეტჩერი ჯერ სცემა, შემდეგ კი დანით სასიკვდილო ჭრილობები მიაყენა, დაკავებულია.
მკვლელობის დეტალების შესახებ თვითმხილვლებზე დაყრდნობით "აქცენტი" წერს. გამოცემის ინფორმაციით, შემთხვევა გახოკიძის ქუჩაზე მოხდა:
"გარდაცვლილი დისპეჩერად მუშაობდა. როგორც ამბობენ, მას ფულის მოპარვა დააბრალეს, რის გამოც ადგილობრივი მცხოვრები ფიზიკურად გაუსწორდა. სავარაუდოდ, ელენთა დაუზიანდა, მაგრამ დაახლოებით ხუთი საათის განმავლობაში დახმარება არავინ გაუწია. დროულად რომ ვინმე დახმარებოდა, შესაძლოა, ოპერაციის გაკეთების შემდეგ გადარჩენილიყო".
მომხდართან დაკავშირებით ოფიციალური განცხადება სსს-მაც გააკეთა:
""შსს-ს თბილისის მთავარი სამმართველოს დეტექტივების სამმართველოს პირველი განყოფილების და ისანი-სამგორის სამმართველოს თანამშრომლებმა, 1984 წელს დაბადებული ვარლამ ჩ. განზრახ მკვლელობის ბრალდებით თბილისში დააკავეს.
გამოძიებამ დაადგინა, რომ 17 ივნისს ვარლამ ჩ-მ ვარკეთილის დასახლებაში, გახოკიძის ქუჩაზე, შურისძიების ნიადაგზე ურთიერთშელაპარაკებისას, 1969 წელს დაბადებულ გელა ა-ს ბლაგვი საგნით სხეულზე მძიმე დაზიანებები მიაყენა და შემთხვევის ადგილიდან მიიმალა. გელა ა. ადგილზე გარდაიცვალა.
სამართალდამცველებმა ვარლამ ჩ. მომხდარიდან მეორე დღეს დააკავეს. დაკავებული აღიარებს ჩადენილ დანაშაულს. გამოძიება განზრახ მკვლელობის ფაქტზე, საქართველოს სსკ-ის 108-ე მუხლით მიმდინარეობს".