ჰოლანდიაში ინტერპოლის მიერ ძებნილი, საქართველოს შეიარაღებული ძალების გაერთიანებული შტაბის სამხედრო პოლიციის დეპარტამენტის უსაფრთხოებისა და განსაკუთრებულ დავალებათა მთავარი სამმართველოს ყოფილი უფროსი გიორგი დგებუაძე, იგივე "მასტერა" დააკავეს, - ინფორმაციას "ინტერპრესნიუსი" ავრცელებს და წერს, რომ დაკავება პროკურატურამ დაადასტურა.
"ინტერპრესნიუსის" ცნობით, პროკურატურის საზოგადოებასთან ურთიერთობის სამსახურში აცხადებენ, რომ ჰოლანდიელმა სამართალდამცველებმა გიორგი დგებუაძე საქართველოს მთავარი პროკურატურის მოთხოვნის საფუძველზე აიყვანეს.
არსებული ინფორმაციით, "მასტერა" ამჟამად საპატიმრო დაწესებულებაშია მოთავსებული და მისი ექსტრადიციის საკითხი განიხილება.
მთავარმა პროკურატურამ საქართველოს შეიარაღებული ძალების გაერთიანებული შტაბის სამხედრო პოლიციის დეპარტამენტის უსაფრთხოებისა და განსაკუთრებულ დავალებათა მთავარი სამმართველოს ყოფილ უფროსს გიორგი დგებუაძეს ბრალი გასული წლის 7 მარტს წაუყენა.
უწყების განცხადებით, დგებუაძეს ბრალად სამსახურებრივი უფლებამოსილების გადამეტება, თავისუფლების უკანონო აღკვეთისა და წამების ორგანიზებება ედება.
"გიორგი დგებუაძეს კანონით დადგენილი წესით წარედგინა ბრალდება საქართველოს სისხლის სამართლის კოდექსის333-ე მუხლის მე-3 ნაწილის "გ" ქვეპუნქტით; 25-ე, 143-ე მუხლის პირველი ნაწილით; 25-ე, 1441-ე მუხლის მე-2 ნაწილის "ა"; "ბ" და "ე" ქვეპუნქტებით", - ნათქვამია პროკურატურის განცხადებაში.
