2014-06-28 17:36

გვიან ღამით საპატრულო პოლიციამ ტელეკომპანია "ტაბულას" თანამშრომელი და მასთან ერთად მყოფი ორი პირი დააკავა. შინაგან საქმეთა სამინისტროში აცხადებენ, რომ აღნიშნული 3 ადამიანი ადმინისტრაციულ სამართალდარღვევათა კოდექსის 173-ე მუხლით დააკავეს, რაც პოლიციელისთვის წინააღმდეგობის გაწევას გულისხმობს.

რის საფუძველზე გაუწიეს წინააღმდეგობა დაკავებულებმა, პოლიციელებს შსს-ში არ აკონკრეტებენ. თავად "ტაბულას" მიერ გავრცელებული ინფორმაციის თანახმად კი, პოლიციელებმა განაცხადეს, რომ მათი ინფორმაციით, დაკავებულებს იარაღი ჰქონდათ და მათ სამართალდამცავებს წინააღმდეგობა გაუწიეს, "ტაბულა" აცხადებს, რომ ეს ინფორმაცია არ დადასტურდა.

გარდა აღნიშნულისა, ტელეკომპანია შინაგან საქმეთა სამინისტროს მიმართ რამდენიმე პრეტენზიას აყენებს. "ტაბულას" ინფორმაციით, ტელეკომპანიის იურისტი დაკავებულთან არ შეუშვეს. ამის საპირისპიროდ შსს-ში აცხადებენ, რომ პოლიცია კანონის ფარგლებში მოქმედებდა, რადგან მას არ ჰქონდა ინფორმაცია, რომ ადგილზე იურისტი იმყოფებოდა და დაკავებულთან შეხვედრა სურდა.

"ტაბულას" მიერ გავრცელებული ინფორმაციით კი, იურისტმა არაერთგზის განუმარტა პოლიციას, რომ კანონით მას დაკავებულის ნახვის უფლება ჰქონდა, თუმცა მის თანამშრომელთან მაინც არ შეუშვეს. "ტაბულა" ასევე ავრცელებს ინფორმაციას, რომ პოლიციელები ნასვამ მდგომარეობაში იმყოფებოდნენ, და როცა ამის გამო "ტაბულას" ადგილზე მყოფმა ჟურნალისტმა გენერალური ინსპექცია რამდენჯერმე გამოიძახა, ისინი ადგილზე არ მისულან , ამის გამო პოლიციამ ოქმიც შეადგინა. შსს-ში კი აცხადებენ, რომ გენერალური ინსპექცია ადგილზე იმყოფებოდა:

"გადავამოწმეთ და ყველა პოლიციელი იმყოფებოდა ფხიზელ მდგომარეობაში".-აცხადებენ შსს-ში. შსს-ს ასევე უარყოფს კიდევ ერთ ბრალდებას, რომელიც თანმხლები პირების ცემას უკავშირდება. "ნეტგაზეთის"შეკითხვაზე, ჩატარდა თუ არა მოკვლევა ამ კონკრეტულ ბრალდებასთან დაკავშირებით, შსს-ში განგვიცხადეს: "შემიძლია განვაცხადო, რომ პოლიციელების მხრიდან ძალადობა არ მომხდარა'.

"ტაბულა" აცხადებს, რომ ყველა ის პრეტენზია, რომლებიც მათ შინაგან საქმეთა სამინისტროს მიმართ აქვთ, გადაღებულია და ტელეკომპანია შესაბამის ვიდეომასალას გაავრცელებს. დაკავებულების სასამართლო პროცესი დღეს, 28 ივნისს გაიმართება. 173-ე მუხლი ბრალის დამტკიცების შემთხვევაში 400 ლარის ოდენობის ჯარიმას, ან გამასწორებელ სამუშაოებს ერთიდან ექვს თვემდე ვადით, ხელფასიდან ოცი პროცენტის დაქვითვით ითვალისწინებს, ხოლო თუ საქმის გარემოებათა და დამრღვევის პიროვნების გათვალისწინებით ამ ზომების გამოყენება არასაკმარისად იქნება მიჩნეული – ადმინისტრაციულ პატიმრობას 90 დღემდე ვადით.

"ნეტგაზეთი"