მოსკოვის დომოდედოვოს აეროპორტიდან დეპორტირებული ე.წ. კანონიერი ქურდი ლევან მარღია, იგივე "ლევიკ ზუგდიდსკი" სამართალდამცველებმა თბილისის აეროპორტში დააკავეს.
1978 წელს დაბადებული ლევან მარღია კანონიერი ქურდობის ბრალდებითაა დაკავებული. გამოძიებამ დაადგინა, რომ ბრალდებული აღიარებს ქურდულ სამყაროს, თავს კანონიერ ქურდად მიიჩნევს და გარკვეული პერიოდიდან მისი წესების დაცვით ცხოვრობს.
გამოძიება ქურდული სამყაროს წევრობის ფაქტზე მიმდინარეობს (საქართველოს სისხლის სამართლოს კოდექსის 223-ე პრიმა მუხლის მეორე ნაწილით).
შეგახსენებთ, ეს პირველი შემთხვევაა 2012 წლის არჩევნების შედეგად ხელისუფლების შეცვლის შემდეგ, როცა სხვა ქვეყნიდან დეპორტირებულ ე.წ. კანონიერ ქურდს აეროპორტშივე აკავებენ. მანამდე "კანონიერი ქურდების" მიერ საქართველოს საზღვრის გადმოკვეთა საერთოდ არ ფიქსირდებოდა.
მედიის ნაწილის მიერ გავრცელებული ინფორმაციით, ე.წ. კანონიერ ქურდებს სამართალდამცველები არ აკავებდნენ და თურქეთში გადასვლის საშუალებას აძლევდნენ, რის შემდეგაც ისინი ხშირად ისევ იმავე ქვეყანაში აღმოჩნდებოდნენ ხოლმე, საიდანაც რეპორტით აგზავნიდნენ. ლევან მარღიას შემთხვევაში ეს "ტრადიცია" დაირღვა.
