ე.წ. კანონიერი ქურდი, 37 წლის ზუგდიდელი ლევან მარღია, იგივე „ლევიკ ზუგდიდსკი“ მოსკოვის დომოდედოვოს აეროპორტიდან სამშობლოშია დეპორტირებული.
დადგენილი პროცედურის თანახმად, ის თვითმფრინავის ბორტზე ააცილეს რუსეთის შსს-ს სისხლის სამართლის განყოფილების თანამშრომლებმა და თბილისში გამოამგზავრეს. ინფორმაცია მარღიას დაკავების შესახებ ჯერჯერობით არ გავრცელებულა.
რუსეთიდან ლევან მარღიას დეპორტირების საფუძველი სასამართლოს გადაწყვეტილება გახდა, რომელმაც მიიჩნია, რომ მას არა აქვს კანონიერი საფუძველი, იმყოფებოდეს რუსეთის ტერიტორიაზე.
შეგახსენებთ, 22 მარტს, უკვე სანკტ-პეტერბურგში, კიდევ ერთი ე.წ. კანონიერი ქურდი, 32 წლის ირაკლი ბულისკერია, იგივე „იკა გალსკი“ დააკავეს. მას ჩხრეკის დროს აღმოჩენილ განსაკუთრებით დიდი ოდენობის კოკაინთან ერთად ( 9 გრამი), ვინმე ჯოპუას სახელზე გაცემული პასპორტიც უპოვეს, სადაც თავად ბულისკერიას ფოტო იყო ჩაკრული. ბრალის დამტკიცების შემთხვევაში ირაკლი ბულისკერიას, რომელიც მანამდე არ იყო ნასამართლევი, ხანგრძლივი პატიმრობა ემუქრება.
შეგახსენებთ, ირაკლი ცნობილი, აწ უკვე გარდაცვლილი კრიმინალური ავტორიტეტის რენო ბულისკერიას ვაჟია. იმის მიუხედავად, რომ ციხეში ყოფნის გამოცდილება არ ჰქონია, ირაკლი „ტიტულს“ კარგა ხანია, ატარებს. ასევე „კანონიერი ქურდია“ მისი ბიძაშვილი კახა ბულისკერია, რომელმაც „ტიტულის“ დაკარგვა და შემდეგ ისევ უკან დაბრუნება უკვე მოასწრო.
