2014-11-10 19:11

5 ოქტომბერს გარდაცვლილი დავით ჭავჭავაძე წლების განმავლობაში CIA-ს (აშშ-ის ცენტრალური სადაზვერვო სამმართველო) აგენტი იყო. ჭავჭავაძე თავისი სისხლით დაკავშირებული იყო რომანოვების სამეფო დინასტიასთანაც, რომელიც რუსეთს სამასი წლის განმავლობაში მართავდა.

დავით ჭავჭავაძის ცხოვრებისა და საქმიანობის, მისი მოღვაწეობის შესახებ „ვაშინგტონ პოსტი“ წერს.

სტატიაში აღნიშნულია, რომ CIA-ში ის იბრძოდა ბოლშევიკების წინააღმდეგ, რომლებმაც რომანოვების დინასტია დაამხეს 1917 წელს.

„თავის მემუარებში ჭავჭავაძე წერდა, რომ თავს მოვალედ მიიჩნევდა, ებრძოლა საერთაშორისო კომუნიზმის წინააღმდეგ.

ის 1924 წლის 20 მაისს ლონდონში დაიბადა, სადაც კომუნისტური რეჟიმისგან დევნილმა მისმა ოჯახმა თავშესაფარი ჰპოვა. მამამისი მწერლობასა და მთარგმნელობას (ქართულიდან ინგლისურად) უთავსებდა ერთმანეთს.

მას შემდეგ რაც მისი სწავლება იალის უნივერსიტეტში შეწყდა, ის ომისშემდგომი ბერლინის არმიაში მსახურობდა, ბოლოს კი მეგობრის დახმარებით CIA-ის რიგებში ჩაირიცხა.

1966 წელს ვაშინგტონის უნივერსიტეტის საავადმყოფოში მისი ვაჟი, მიხეილი იშვა და ნათელი შეიქნა, რომ მის გვარს მემკვიდრე გამოუჩნდა.

„როცა დედაჩემმა მიხეილის დაბადება გაიგო, "ვაშაო!" შესძახა და დაამატა, დინასტია გადარჩენილიაო“, - წერს ის მემუარებში.

"ვაშინგტონ პოსტის" მიხედვით მოამზადა ბექა ბერულავამ