გადაცემაში „პოლიტიკის დრო“ დაკავებული გიორგი ღონიაშვილის მეგობარმა გიორგი კაპანაძემ განაცხადა, რომ გამოძიებასთან ითანამშრომლა, რათა ხალხისთვის დაენახებინა „ნაციონალური მოძრაობის“ ნამდვილი სახე. მისი თქმით, ნაცმოძრაობას საარჩევნოდ მილიონნახევრის „გაცოცხლება“ უნდოდა.
კაპანაძემ განაცხადა, რომ გიორგი ღონიაშვილი გიგი უგულავას დავალებით მოქმედებდა, ხოლო თავად კაპანაძეს ღონიაშვილი დაუკავშირდა. გიორგი კაპანაძის, იგივე „რიჟას“ თქმით, ის გიგი უგულავასაც ხვდებოდა. კაპანაძემ განაცხადა, რომ მან სქემა გაშიფრა:
„უგულავა უკავშრდებოდა კეზერაშვილს, ერთერთი ევროპული კომპანიის მეშვეობით ევროპული ბანკიდან ჩემს ასევე ევროპული კომპანიის ანგარიშზე გადმორიცხავდნენ თანხას ფიქტიური ხელშეკრულებით და მე ეს თანხა ქეშად უნდა გადამეცა უშუალოდ ღონიაშვილისთვის. მან განმარტა რომ ეს იყო „ნაციონალური მოძრაობის“ დასაფინანსებელი თანხები არჩევნებისთვის. ეს იყო კეზერაშვილის ფული.
მოხდა ტრანზაქცია 760 ათასი დოლარის ოდენობით, დაიდო ფიქტიური ხელშეკრულება, ისინი რიცხავდნენ ჩემი კომპანიის ანგარიშზე, ვრიცხავდი ქართული კომპანიის ანგარიშზე, გამომქონდა თანხები ანგარიშიდან და გადავცემდი ღონიაშვილს, თუმცა, ეს არ გამოუვიდათ“, - ამბობს კაპანაძე.
