ამერიკულ ქალაქ ლაპლასის (ლუიზიანა) მცხოვრებლები უსიამოვნოდ გაოცებული დარჩნენ, როცა ქუჩაში მოხეტიალე სამმეტრიანი ალიგატორი დაინახეს, რომელიც, როგორც გაირკვა, კანალიზაციის ჭიდან ამოძვრა.
გიგანტური რეპტილია ქუჩაში დადიოდა, მანქანებს კუდს ურტყამდა და ერთერთი სახლის შესასვლელი გაღებას თავითაც კი შეეცადა.
"მეგონა, ფანტასტიკური ჟანრის ფილმს ვუყურებდი", - განაცხადა ადგილობრივმა მცხოვრებმა ქალმა, რომელიც ნიანგს დილით, სამსახურში მიმავალი გადაეყარა. მან მობილურით გადაღება დაიწყო, მაგრამ მანამდე შერიფს დაურეკა, რომელმაც, თავის მხრივ, მოსახლეობა საფრთხის შესახებ გააფრთხილა.
იმ სახლში მცხოვრები ცოლ-ქმარი, სადაც ნიანგი "აკაკუნებდა", იხსენებს, რომ მხოლოდ შემთხვევით არ გააღეს კარი, როცა "კაკუნი" მოესმათ:
"სწორედ ამ დროს მეზობელ ქალს დაურეკავს შერიფისთვის. ვერც წარმოიდგენთ, როგორია, როცა დილით შერიფი გირეკავს შემდეგი ტექსტით: "გამარჯობა, შერიფი გაწუხებთ, თუ შეიძლება, კარი არ გააღოთ, თქვენს სახლში ნიანგი ცდილობს შესვლას...", - ამბობს სახლში მცხოვრები ქალი.
ქალაქში მცხოვრებლები იხსენებენ, რომ აქ ნიანგები ადრეც უნახავთ, მაგრამ ისინი შედარებით მცირე ზომისა იყვნენ.
საბოლოოდ, ნიანგი სამართალდამცველებმა და ცხოველთა მონიტორინგის წარმომადგენლებმა შეიპყრეს და სპეციალურ სამყოფელში მოათავსეს.
