2014-12-27 23:39

ის, რაც გუშინ პარლამენტის სესიაზე მოხდა, საქართველოს ისტორიას არ ახსოვს.

ვითარების გამწვავება საპარლამენტო უმცირესობის წარმომადგენელს, დეპუტატ აკაკი ბობოხიძეს ბრალდება, რომლის  უცენზურო გამონათქვამებმა აურზაური და ცემა-ტყეპა გამოიწვია.

„დიახ, შევიგინე, იმას შევაგინე, ვინც მე შემაგინა. ბუნებრივია ვისაც მიკროფონი არ აქვს ჩართული, მისი ხმა არ ისმის, მხოლოდ ჩემი გაისმა, რადგან ჩემი მიკროფონი ჩართული იყო.

სამწუხაროდ, მომიწია პასუხის გაცემა გინებასა და შეურაცყხოფაზე და იქვე მოუხადე ბოდიში საქართველოს მოსახლეობას. საქართველოს მოსახლეობას კიდევ ერთხელ ვუხდი ბოდიშს, პარლამენტიდან მგავსი სიტყვები არ უნდა ისმოდეს, მაგრამ ვისაც შევაგინე, იმაზე ახი იყო.

კონკრეტულად რომელმა დეპუტატმა შემაგინა- არ ვიცი, მისკენ არ ვიყურებოდი, მხოლოდ ხმა გავიგონე და თავის დაცვა ვცადე. ვიმეორებ, ჩხუბი და აყალმაყალი მე არ დამიწყია. ეგენი დამესხნენ თავს და თავის დაცვაც არ მაცალეს.

არ ვაპირებ ვინმეს რამე დავუთმო, როცა უპასუხისმგებლოდ იქცევიან, აუცილებლად მიიღებენ ხურდას,“ - აღნიშნა კაკო ბობოხიძემ.

სასესიო დარბაზში გამართულ ვაკხანალიაში ყოფილი პრემიერის თანაკურსელი თამაზ მეჭიაურიც აქტიურად მონაწილეობდა.

„ეს რა ჩხუბი იყო, ეს იყო პატარა ინციდენტი. შეურაცხყოფა მოგვაყენეს, გვაგინეს და ამას მოჰყვა ეს ინციდენტი... „ნაციონალებს" არ ესმით, როგორც ჩანს, რომ საქართველოს პარლამენტში არ შეიძლება ჩხუბი და ლანძღვა-გინება.

რაც არ უნდა მოხდეს, ასე დედის გინება და უხამსი სიტყები გაგონილა?! მათ უხამს სიტყვებს მოჰყვა ადეკვატური რეაქცია.  მე არ მიჩხუბია, რაღა დროს ჩემი ჩხუბია, ბერიკაცი ვარ. უნდა ვნახო ერთი ვიდეო, სადაც ჩანს, რომ ვჩხუბობ, ორეული ხომ არ მყავს, ნეტავ?! - რიტორიკულად იკითხა მეჭიაურმა.

„კვირის პალიტრა“