2014-02-06 20:46

არგენტინაში 1986 წლის მსოფლიო საფეხბურთო ჩემპიონატის ფინალური ეტაპის დაწყებამდე არგენტინაში ყველა, ვისაც არ ეზარებოდა, ნაკრების მთავარ მწვრთნელს კარლოს ბილარდოს ლანძღავდა.

ბილარდოს აგინებდა ყველა: სპორტული ჟურნალისტები, გულშემატკივრები... აგინებდნენ და ლანძღავდნენ ფეხბურთელებსაც. ერთადერთი, ვის მიმართაც, მეტნაკლებად, პატივისცემას ინარჩუნებდნენ, დიეგო არმანდო მარადონა იყო – ტალანტები არ განისჯებიან.

კარლოს ბილარდო მისკენ გამიზნულ ბოღმიან სტატიებს, ტელეინტერვიუებს და გამოხტომებს დუმილით ხვდებოდა. მას საჯაროდ არავისთვის უპასუხია.

გავიდა დრო და არგენტინის ნაკრებს მე–13 მსოფლიო ჩემპიონატის ფინალში მოუწია თამაში, სადაც გფრ–ის ნაკრები 3:2 დაამარცხა და ოქროს თასის მფლობელი გახდა.

მთავარი სწორედ მაშინ მოხდა: „აცტეკაზე“, ფინალური მატჩის შემდეგ არგენტინელმა გულშემატკივრებმა მოპირდაპირე ტრიბუნის თითქმის ნახევარზე გაშალეს უზარმაზარი პლაკატი წარწერით:

„გვაპატიე ბილარდო! გმადლობთ!“.