2015-04-13 08:33

ხაკასიაში ხანძარი მძვინვარებს, რომლის მასშტაბები ერთი ღამის განმავლობაში კატასტროფულად გაიზარდა და ქალაქ ჩერნოგორსკს მიაღწია. დაღუპულია 5 ადამიანი, 900-ზე მეტი სახლი დაიფერფლა, 100-ზე მეტი ადგილობრივი მცხოვრები ჰოსპიტალიზებულია.

ხანძრის კერებს საგანგებო სიტუაციათა სამინისტროსა და ადგილობრივთა გაერთიანებული ძალები აქრობდნენ. თუმცა, მათ ხელს უშლიდა ძლიერი ქარი, 15-20 მ წამში. ცეცხლი სწრაფად ვრცელდებოდა და ბოლოს ქალაქ ჩერნოგორსკს მოედო.

ადმინისტრაციის მეთაურმა საგანგებო მდგომარეობა გამოაცხადა და მოსახლეობას მოუწოდა, არ დარჩნენ სახლებში და ებრძოლონ ხანძარს: "ახლა ყველას ხელი მნიშვნელოვანია", - განაცხადა ქალაქის თავმა. 

მოსახლეობის ნაწილში გაღიზიანებას იწვევს ფაქტი, რომ არც ევაკუაცია გამოცხადდა და ხანძართან ბრძოლაში არც არმია მონაწილეობს, როგორც ეს მიღებულია ცივილიზებულ ქვეყნებში: "გასაგებია, რომ ჩვენი არმია ამისთვის ვერ მოიცლის, მერე უკრაინაში ვინ იომოს", - წერენ სოციალურ ქსელებში. 

შეგახსენებთ, ხაკასია სამხრეთ ციმბირში, მდინარე ენისეის მარცხენა ნაპირის ფართობში, საიანო-ალტაის მთიანეთის ტერიტორიაზე მდებარეობს.